Kố cho tơdroăng ki châ tơbleăng a rôh hôp tơbleăng tơkŭm po kơxê lơ 12/3 pa gong rôh leh mơđah tơbleăng kơphế Ƀuôn Ma Thuột rôh má 9. Têt Bunpimay Lếo cho hâi leh kân má môi tung hơnăm dêi mơngế Lếo, cho rôh vâ vâi mơhno hiâm mơno nhuô̆m ƀă Ƀok Phop ƀă jâ pôa. Tiô tối hdrối, Têt Bunpimay Lếo hơnăm Phật lịch 2568 kô po sap ing hâi lơ 12 – 13/4 la ngiâ a ƀuôn Trí, cheăm Krông Na, tơring Buôn Đôn.

Cho tơdroăng ki tơkŭm po kân má môi sap nah troh nôkố, Têt Lếo hơnăm kố kô ai tơdroăng tơkŭm po hơniâp ro môi tiah: Leh xối pleăng hơnăm nếo, Leh mơdĭng Reăng on kơđĕng, Leh kât prế a kŏng, Leh tông apía hơngui, Rôh tơ’noăng “Ngế lĕm Bunpimay”, tơ’noăng pế pơchên 100 túa kế kâ kơhiâm Tây Nguyên, Mơdĭng kơxê têa, Pro hơkôp túa lĕm tro, Ôu kâ Bufet rui ƀă mâu tơdroăng ngê̆ thuât hơdruê xoăng ki hơniâp ro.