Ƀuôn Kli A, bêng Đạt Hiếu, pơlê krâm Ƀuôn Hồ, kơtăn pơlê kong kơdrâm Ƀuôn Ma Thuột lối 40 km. Pơlê nôkố ai 276 rơpŏng kuăn pơlê rêh ối, tâi tâng cho mơngế Rơđế, ối rak châ hên khôi túa lĕm môi tiah chêng koăng, mâu têng nêng hdroâng kuăn ngo, mâu tơdroăng mơdĭng ƀă mâu tơdroăng cheăng tiô khôi vâi krâ nah.

Sap hơnăm 2023, ƀuôn Kli A hiăng châ pơlê kong krâm Ƀuôn Hồ mơ’no liăn cheăng mơjiâng pro tơmeăm ƀă kơpong mơđah tơbleăng khôi túa lĕm, hngêi trá xŏn, vêh pro ƀă rơnêu têa kơneăng. Hơnăm 2024, Vi ƀan kong pơlê Dak Lak hiăng rah xo ƀuôn Kli A ƀă 4 rơpŏng tung pơlê vâ tŏng gum ƀă kêi đeăng tơdroăng mơ’no liăn mơnhông ôm hyô pơlê pơla.

Tiô pơkâ troăng prôk a la ngiâ, ƀuôn Kli A kô mơjiâng pro mâu tơmeăm ôm hyô pơlê pơla môi tiah châ tâ, ti tăng plĕng tơdroăng rêh ối, pêi cheăng, pêt mơjiâng tơmeăm dêi kuăn pơlê mơngế Rơđế; châ tâ khôi túa lĕm tro vâi krâ nah môi tiah chêng koăng, mơđah tơbleăng văn hok ngê̆ thuât vâi krâ nah, tơmeăm kơchâi kâ vâi krâ nah ƀă trâm mâ, tơdjêp pơla mâu pơlê pơla; lăm ngăn loăng pơlái kong kế ƀă tơdjêp mâu tíu troh tung troăng prôk ôm hyô.