Kơxo hâi lơ 20/6, Khu xiâm ngăn ‘na Túa lĕm tro - Tơ’noăng ivá ƀă Ôm hyô kong pơlê Dak Lak tơkŭm po lâm hnê tơdroăng mơjiâng ƀă mơnhông tơmeăm tơbleăng ôm hyô a kong pơlê. Veăng hriâm lâm mê ai lối 50 ngế cho mâu ngế pêi hnoăng cheăng ‘na ôm hyô a mâu tíu ôm hyô, tíu ối pơtê homestay, mâu rơpŏng hngêi ki ‘no liăn pro tíu ôm hyô ngăn ‘na chiâk deăng, kơdrum deăng.

Lâm hnê hriâm vâ kơjo kum, pro tơ’lêi hlâu ăm mâu ngế ki pêi cheăng ‘na kơvâ ôm hyô mơdêk hlê plĕng tơdroăng tơbleăng mơhno tíu, hlê mơjiâng tíu ôm hyô ki tơtro; vâ ai hên tơmeăm tíu ôm hyôh ki lĕm tơviah, tơ’mot hên tơmối troh ƀă Dak Lak.

Jâ Nguyễn Thuỵ Phương Hiếu, Ngế xiâm phŏ pơkuâ ngăn Túa lĕm tro - Tơ’noăng ivá ƀă Ôm hyô kong pơlê Dak Lak ăm ‘nâi, lâm hriâm mê pêi pro tro tiô pơkâ hnê rêm hơnăm ing tơdroăng Tơkêa bro mơnhông mơdêk ‘na ôm hyô dêi kong pơlê châ Khu kăn Đảng kong pơlê pơkâ sap ing hơnăm 2021.