Kong măng lơ 9/5, a plông kơtu ƀâ long tơring Krông Nô, kong pơlê Dak Nông hiăng po leh pơxiâm po “Hâi Mơhno túa lĕm tro, tơ’noăng ivá mâu hdroâng kuăn ngo tơring Krông Nô hơnăm 2023”. Hâi mơdĭng kố ki xiâm cho vâ koh tơbâ 133 hơnăm hâi kot mâ pôa Hồ Chí Minh lơ 19/5.

Veăng ai mâ a hâi mơdĭng kố ai lối 400 ngế ngê̆ nhân, diẽn viên ƀă mâu ngế ki tơ’noăng dêi mâu hdroâng kuăn ngo rêh ối a mâu cheăm, pơlê kân tung tơring. Po tung 2 hâi lơ 9 ƀă lơ 10/5, hâi mơdĭng ai hên tơdroăng cheăng pêi pro ai pơxúa môi tiah: ‘Mâi bro mâu tơdroăng ki xối pleăng tiô chal krâ nah dêi mâu hdroâng kuăn ngo a tơring; Tŏn chêng koăng ƀă mâu rêi mâu tơdrá proâ dêi hdroâng kuăn ngo; Tơ’noăng pro kâng ƀă mâu môn tơ’noăng ‘na ivá tiô chal krâ; Tơ’noăng mơđah sâp ếo pơtâk hdroâng kuăn ngo; Tơ’noăng pế pơchên kế kâ, tơmeăm ôu ƀă mâu tơdroăng xah hêi ton nah.

Ngê̆ nhân Y Ân (hdroâng M’Nông) a thôn Phú Lợi, cheăm Quảng Phú, tơring Krông Nô, kong pơlê Dak Nông tối tiah kố, tơdroăng ki tơkŭm po hâi mơdĭng kố kô veăng kum mơjiâng ƀă rak vế, mơdêk mâu tơdroăng ki kơnía ‘na khôi túa lĕm tro dêi mâu hdroâng kuăn ngo a tơring.