Kơxo lơ 6/6, a Hngêi tơ’noăng ivá kong pơlê Gia Lai, Khu pơkuâ ‘na mơhno khôi túa lĕm tro – Tơ’noăng ivá ƀă Ôm hyô hiăng pơxiâm po Olympic vâi hdrêng ƀă mơhnhôk tâi tâng kuăn pơlê pơtâp môn klê têa, hbrâ – mơdât klâk têa tung kong pơlê ƀă Pri ối má môi klê têa kong pơlê Gia Lai hơnăm 2023.

Tiô Khu pơkuâ ‘na mơhno khôi túa lĕm tro – Tơ’noăng ivá ƀă Ôm hyô Gia Lai, klâk têa dế cho xiâm kối ki má môi pro hlâ a vâi hdrêng ƀă vâi hdêng phô̆m xông kân a kong pơlê. Sap apoăng hơnăm troh nôkố, lâp kong pơlê ai 22 roh, pro 30 ngế vâi hdrêng hlâ, lôi ai tơdroăng châi ôh tá kâi piu tung hên rơpŏng.

A roh leh, mâu vâi o hok tro châ hnê ƀă hnê mơhno pêi pro mâu tơdroăng xiâm: tơdroăng pơlât apoăng drêng klâk têa; mâu pơkâ pơlât apoăng drêng trâm xía vâ; pơlât drêng trâm ngế klâk têa; troăng pơlât apoăng drêng klâk têa. Xuân ối tung tơdroăng, Khu tơkŭm po hiăng pơxiâm po Tơ’noăng Pri ối má môi klê têa kong pơlê Gia Lai hơnăm 2023, ƀă 150 ngế tơ’noăng kô tơ’noăng a 5 rơxông sap ing 7 troh 17 hơnăm.