Mâu hâi hiăng hluâ, pơlê kong kơdrâm Plei Ku, kong pơlê Gia Lai kơdrâm phiu ro ƀă tơdroăng tơkŭm dêi vâ chê 500 ngế tơ’noăng troh tơ’noăng a Hneăng tơ’noăng ivá mâu hdroâng kuăn ngo lâp tơnêi têa roh má XIII, kơpong II hơnăm 2023. Mâu tíu tơ’noăng tung pơlê kong kơdrâm mơhnhôk kơdrâm kuăn pơlê troh lăm ngăn hên.

Mâu ngế tơ’noăng mơhno hiâm mơno tơ’noăng kơtăng. Ngế tơ’noăng Quách Ngọc Hoan, Khu tơ’noăng ivá kong pơlê Dak Lak, loi tơngah.

‘’Hneăng tơ’noăng hơnăm 2022, Khu tơ’noăng Dak Lak châ kâ ối má môi môn pĕng mơnĕng. Khu tơ’noăng Dak Lak troh ƀă hneăng tơ’noăng hdroâng kuăn ngo tung hơnăm kố mê khu ngin hiăng mơ-eăm tâi tâng. Mơhé ai hên khu tơ’noăng ki ê rơdêi ‘na môn pĕng mơnĕng môi tiah Bình Định, Gia Lai, Kon Tum, Quảng Ngãi, laga tung tơdroăng pơtâp mê khu ngin hiăng mơ-eăm tâi ivá vâ pơtâp, mơ-eăm tâi ivá tơná châ kâ hên môi tiah hơnăm nah há’’.

A hneăng tơ’noăng kố, Gia Lai, Dak Lak ƀă Kon Tum cho mâu khu ki veăng tŭm 7 môn. Pôa Nguyễn Văn Ý – Kăn phŏ pơkuâ Khu pơkuâ ‘na mơhno khôi túa lĕm tro – Tơ’noăng ivá ƀă Ôm hyô tối ăm ‘nâi: Hiăng 10 hơnăm kố Gia Lai nếo tơkŭm po hneăng tơ’noăng râ tơnêi têa. Kố cho tơdroăng ki kân, ôh tá xê to tơ’noăng ‘na ivá mê ối cho roh trâm mâ, tơkŭm mâu hdroâng kuăn ngo nhŏng o.

Khu tơ’noăng Gia Lai ai tơ’nôm mâu ngế tơ’noăng cho mơngế hơnăm ối nếo rơkê. Ki rơhêng vâ tối môn pĕng mơnĕng ai hên ngế tơ’noăng rơkê pĕng hiăng châ kâ. Mâu vâi o châ pơtâp ing mâu hneăng tơ’noăng ivá lâp kong pơlê tung hơnăm 2022. Mơhnhôk Rơchâm Dác – Khu tơ’noăng ivá dêi kong pơlê Gia Lai tối:

‘’Kố cho roh má pŭn á veăng roh tơ’noăng lâp tơnêi têa, tung 3 rôh tơ’noăng hdrối á châ kâ 6 mê dái mêa. Hơnăm kố hiăng châ 1 mê dái mêa tơ’noăng kơtâu 100 met, á kô mơ-eăm châ kâ tơ’nôm mê dái kơtâu 300 met. Á vâ diâp ăm mê dái kố ăm pú hmâ, ƀă nhŏng o, vâ ăm nôu pâ hâk’’.

Hneăng tơ’noăng ivá mâu hdroâng kuăn ngo lâp tơnêi têa roh má XIII, kơpong II ôh tá xê to tíu xah hêi pơxúa ăm mâu ngế tơ’noăng, mê ối cho môi roh tơ’lêi vâ mơnhông mơdêk khôi túa lĕm, khôi vâi krâ nah ƀă tơdroăng tơrŭm môi tuăn dêi mâu hdroâng kuăn ngo nhŏng o. Hneăng tơ’noăng xuân kum hên tung mơnhông mơdêk ivá ƀă ôm hyô dêi kơpong II tối krê ƀă lâp tơnêi têa tối tơdjuôm.

Pôa Nguyễn Liên Phương – Kăn phŏ pơkuâ Khâu ngăn ‘na mơhno khôi túa lĕm tro, Tơ’noăng ivá ƀă ôm hyô kong pơlê Quảng Ngãi, tối:

‘’A hâi kố mê tâi tâng khu tơ’noăng troh a kố, tâi tâng 13 khu troh a kố ƀă hiâm mơno phiu ro, sôk suâ. Ki xiâm cho vâ trâm mâ tơpui tơno ‘na khôi túa lĕm ƀă tơ’noăng ivá vâ vâi krâ kuăn pơlê hdroâng kuăn ngo trâm mâ ƀă rế hía rế rŭm môi tuăn tâ’’.

Hneăng tơ’noăng hơnăm kố tơkŭm vâ chê 500 ngế tơ’noăng dêi 13 kong pơlê ai kuăn pơlê hdroâng kuăn ngo rêh ối a kơpong peăng hdroh ing pơlê kong kân Đà Nẵng ngiâ pá hdroh: Phú Yên, Lâm Đồng, Ninh Thuận, Bình Phước, Gia Lai, Quảng Nam, Kon Tum, Khánh Hòa, Dak Nông, Bà Rịa-Vũng Tàu, Bình Định, Dak Lak và Quảng Ngãi.

Tâng pơchông ƀă hneăng tơ’noăng roh má XII châ tơkŭm po a kong pơlê Quảng Ngãi a hơnăm 2022, tơ’noăng roh kố hiăng ai tơ’nôm khu kong pơlê Bà Rịa - Vũng Tàu. A Hneăng tơ’noăng hơnăm kố, mâu ngế tơ’noăng tơ’noăng a 7 môn, mê cho: kơtâu, kơtú ƀa long pơla khu mơngế, peăng ƀa long pơla khu kơnốu – khu kơdrâi, pĕng mơnĕng, to chêng klĕng, trut loăng ƀă tơhrot kơxái.

Veăng a hâi tơ’noăng, ngế tơ’noăng Y Thơ Hwing lo ing khu tơ’noăng kong pơlê Dak Lak, tối:

‘’Tung hiâm mơno á ƀă mâu nhŏng o tung khu tơ’noăng Dak Lak cho hâk vâ ‘nâng xua hâi tơ’noăng kố cho môi hâi tơkŭm kơdrâm rŭm môi tuăn tâi tâng mâu hdroâng kuăn ngo. Xua mê, á ƀă nhŏng o tung khu phiu ro ƀă sôk suâ. Kố cho roh ki lĕm tro vâ tâi tâng mâu khu môn tơ’noăng tối tơdjuôm ai roh châ tơ’noăng ƀă mâu nhŏng o hdroâng kuăn ngo ki ê.

Ing mâu hneăng tơ’noăng môi tiah kố xuân mơhnhôk mâu nhŏng o hdroâng kuăn ngo, ing kố ah, cho roh vâ mâu ngế tơ’noăng mơdêk tơ’nôm ki tơdroăng xah ki rơkê mâu môn ƀă châ kâ mê dái ăm dêi kong pơlê tơná’’.

Hneăng tơ’noăng ivá mâu hdroâng kuăn ngo kơpong II châ tơkŭm po rêm hneăng 2 hơnăm/môi xôh, cho tơdroăng vâ pêi rpo troăng hơlâ dêi Đảng ƀă Tơnêi têa ‘na mơnhông cheăng kâ, khôi túa lĕm tro, rêh ối pơlê pơla, tơ’noăng ivá ăm kuăn pơlê mâu hdroâng kuăn ngo; Mơnhông mơdêk rơdâ tơdroăng pơtâp ƀă tơ’noăng ivá mơdêk ivá mo sêi, mơdêk tơdroăng rêh ối mơhno khôi túa lĕm tro, hiâm mơno ăm kuăn pơlê; thăm pơtâng tối, mơhnhôk kuăn pơlê mâu hdroâng kuăn ngo veăng Roh mơhnhôk “Tâi tâng kuăn pơlê pơtâp ivá tiô troăng hnê tơdjâ dêi Pôa Hồ”, ƀă hiâm mơno ‘’Mo châ vâ mơjiâng ƀă gak kring tơnêi têa’’ ƀă tơdroăng pêi “Tâi tâng kuăn pơlê rŭm môi tuăn mơjiâng tơdroăng rêh ối mơhno khôi túa lĕm tro” a pơlê pơla.