Khu xiâm ngăn Tơ’noăng ivá (Khu xiâm ngăn ‘na mơhno Túa lĕm tro- Tơ’noăng ivá ƀă ôm hyô) nếo tơrŭm ƀă Vi ƀan kong pơlê Gia Lai tơkŭm po hneăng tơ’noăng ivá mâu hdroâng kuăn ngo rôh má 13, kơpong II. Hneăng tơ’noăng hơnăm kố tơkŭm vâ chê 500 ngế lo ing 13 to kong pơlê ki ai hdroâng kuăn ngo  rêh ối a kơpong Peăng hdroh tơnêi têa sap ing pơlê kong kân Đà Nẵng tơngi peăng Hdroh, mê cho: kong pơlê Phú Yên, Lâm Đồng, Ninh Thuận, Bình Phước, Gia Lai, Quảng Nam, Kon Tum, Khánh Hòa, Dak Nông, Bà Rịa-Vũng Tàu, Bình Định, Dak Lak ƀă Quảng Ngãi.

Pơchông ƀă hneăng tơ’noăng rôh má 12 châ tơkŭm po a kong pơlê Quảng Ngãi a hơnăm 2022, hneăng tơ’noăng rôh kố ai tơ‘nôm khu kong pơlê Bà Rịa - Vũng Tàu. A rôh tơ’noăng hơnăm kố, mâu ki tơ’noăng ai tơ’noăng a 7 môn, mê cho: kơtâu, kơtú ƀa long, peăng ƀa long kơdrâi - kơnốu, pĕng mơnĕng, to chĕng klĕng, trut loăng ƀă hrot kơxái. Hneăng tơ’noăng ivá mâu hdroâng kuăn ngo tung lâp tơnêi têa rôh má 13, kơpong II hơnăm 2023 tiô tối hdrối kô po tâi troh hâi lơ 23/6.