Lơleăng, priât kong ga hiăng hmâ hlo, hmâ ‘nâi ƀă vâi krâ-nhŏng o hdroâng kuăn ngo, ing tuăn tơmiât, kŏng ƀĕng ƀeăn tung túa pế pơchên tơmeăm kong mê khoh chiâng kơchâi kâ ki hơ-iâ, kơhiâm, xú hŏm. Kơchâi ki hơ’nêh í piê tơvât ƀă châu priât kong ga hiăng ai sap ing vâi krâ nah tung pơlê pơla hdroâng Rơđế. Kố xuân cho kơchâi ki ai xiâm kối ing kong kế, ngo ngối. Tiô tơdroăng ki rơkê dêi vâi krâ-jâ nôa roh nah hnê tối, ing châu, kló, pôm, rôa, reăng priât, mơngế Rơđế hmâ xo mâu tơmeăm ki mê vâ pế pơchên chiâng hên tơmeăm kâ ki kơhiâm, ki rơkê khât. Kơchâi ki kố, ôh tá xê pế ton ƀă pá puât, mê ga tơ’lêi tê tung tơdroăng pế pơchên.

Ki rơhêng vâ tối, hơ’nêh mâm í ki pi ăm ga rơtăng tơvât ƀă kló priât, kló lơleăng ki ko xo ing kong kô pro chía ton iâ, ngế ki pế pơchên mê athế rơkê plĕng tung tơdroăng râm mâu po, ƀôt ngot, hăng, plăng, kơtĕm. Vâ kô ai kơchâi kló priât, kló lơleăng ki kơhiâm, hơ-iâ, xú hĕm hŏm, mơngế Rơđế hmâ lăm ko xo priât, lơleăng tung kong ki chiâng achê têa, klêi kơ’nâi ko, vâi lŏng tah tâi tâng hmoâ pá kong xo kló tung dế, lơ môi iâ hmôa kơbâng vâ ko tĕng tơvât ƀă hơ’nêhe mâm í.

Nâ H’Lyna Niê, ối a ƀuôn Sah Ƀ, cheăm Ea Tul, tơring Čư̆ Mgar, kong pơlê Dak Lak tối ăm ‘nâi, sap ing roh ton nah, mơngế Rơđế tối tiah kố, priât, lơleăng ga ai têa hên ƀă xuân cho kế ki lĕm ăm ivá kuăn mơngế, hiăng ai hên kế kâ ki pế ing châu priât, kló priât, môi tiah châu priât pế tơvât ƀă tơpoăng, châu priât, kló priât pế ƀă trŏng xăng, lơ kâ drêh. Kló priât kong ki tơvât ƀă hơ’nêh mâm í mê châ ngăn cho kơchâi kâ ki kơhiâm dêi pơlê cheăm.

‘Kơchâi ki pro ing kló priât athế râm tŭm mâu po hăng, plăng, kơtĕm mê ga nếo tâ kơhiâm. Hơ’nêh í klêi kơ’nâi âp hiăng chên, siê xo hơ’nêh ing mơná í klêi mê ko tĕng. Klêi mê môe tah lôi tâi tâng têa tung kló priât. Kơ’nâi mê nếo pêi hăng, râm tơ’nôm mâu po, ƀôt ngot, kơtĕm xâk, xiâm pơhlăng. Kâ kơchâi  ki kố cho kơhiâm khât”.

Kơchâi ki kố kô chiâng vâ kâ tê kơtê lơ kâ ƀă hmê. Ki hơ-iâ dêi kló priât ga tơtrro ƀă ki hăng dêi hăng. Kơchâi ki kố dêi mơngế Rơđế ga phá tâ tâng vâ pơchông ngăn ƀă kơchâi ki tơvât ƀă hơ’nêh mâm í dêi mâu hdroâng kuăn ngo ki ê, xua ga ai tơvât tơ’nôm mâu xiâm pơhlăng, kơtĕm xâk ƀă ki rơmâ dêi pôm prếl, pro mơngế tơmối pơtối rơhêng vâ kâ. Maluâ tơdroăng rêh hâi kố hiăng ai hên ki hơ’lêh, tơdroăng ki tê mơdró a kơchơ ai hên mâu kari, tiu, plăng, hăng ƀă hên hĕng mâu kơchâi hĕm hŏm ki ê hía, ing mê, thăm rế pro kơchâi kâ dêi hdroâng Rơđế thăm rế kơhiâm. Laga, kơchâi ki tơvât kló priât kong ƀă hơ’nêh mâm í ki ko tĕng kố xuân đi đo cho kơchâi kâ ki kơhiâm dêi hên rơpŏng hngêi hdroâng mơngế Rơđế.

Nâ H’Lyna Niê, ối a ƀuôn Sah Ƀ, cheăm Ea Tul, tơring Čư̆ Mgar, kong pơlê Dak Lak tối tơ’nôm, dế nôkố, hên rơpŏng hngêi ối pêt lơleăng, priât kong tung kơdrum hngêi tơná vâ tơ’lêi ai kế ki pơchên kơchâi kâ ăm dêi rơpŏng hngêi. Kố cho kơchâi kâ ki hmâ pro tung mâu hâi ro rih dêi rơpŏng hngêi, dêi pơlê cheăm, xua lơleăng, priât kong ga hiăng châ pêt mơjiâng tung kơdrum deăng hngêi tơná kuăn pơlê.

“Kơchâi ki kố ôh tá păng lôi tung pơlê pơla. Rêm hdroh tâng ai tơdroăng ki hơniâp ro lơ khéa hơ’nêng, nhŏng o trâm, tơpui tơno dêi pó, mơngế Rơđế ối tối pôh í vâ mơhno tối tơdroăng ki hâk mơjo kơ nhŏng o, hơ-ui pâ kơ vâi krâ-nhŏng o. Drêng mê, kơxêng chêng í lơ kơxêng mơná í kô pro chiâng hên kơchâi mâm ki pơrá phá, ôh tá hvât lôi. Kơchâi klêi kơ’nâi siê tâi tâng hơ’nêh mê vâi krâ, vâi ‘nĕng pơrá chiâng kâ”.

Kơchâi kló priât tơvât ƀă hơ’nêh í dêi mơngế Rơđế ga tơ’lêi pro, tơtro ƀă vêa vong dêi kuăn ngo, ngế ki lâi tro kâ môi hdroh kơchâi ki kố kô pơtối nguân vâ kâ nếo tung la ngiâ.