A kuât pơlê Vi Rơ Ngheo, cheăm Đăk Tăng, Vi ƀan tơring Kon Plông nếo tơkŭm po leh tơbleăng pơkâ dêi Vi ƀan kong pơlê Kon Tum mơnhên pơlê ôm hyô pơlê pơla Vi Rơ Ngheo ƀă mơđah tơbleăng Khu tơrŭm cheăng ôm hyô Vi Rơ Ngheo. Pơlê Vi Rơ Ngheo, cheăm Đăk Tăng kơtăn pơlê kân Măng Deang, tơring Kon Plông dâng 40 km vêh peăng mâ hâi luô. Pơlê ai 63 rơpŏng ƀă dâng 300 pơ’leăng mơngế, tâi tâng cho mơngế Rơteăng.

Xua ối xêh tung dế kong ngo, kuăn pơlê pơtối ‘nâi rak vế ki kơnâ khôi túa vâi krâ nah xua mê Vi Rơ Ngheo ối rak hên khôi túa lĕm tung tơdroăng mơjiâng pro hngêi trăng, tơdroăng rêh ối dêi mơngế Rơteăng. Vâ mơjiâng Vi Rơ Ngheo chiâng pơlê ôm hyô pơlê pơla châ Vi ƀan kong pơlê Kon Tum mơnhên, kơtăn kố 4 hơnăm, ing pơkuâ hnê mơhno dêi mâu râ khu râ kăn pơkuâ ƀă kơvâ cheăng kum pơlê tung pơlê hiăng xúa mâu tơmeăm ki ai hlâu, môi tiah loăng, hmốu a têa plông pro kế lĕm mơnâ mâ ngăn ƀă tiú lĕm tung pơlê.

Troh nôkố kuăn pơlê pơla Vi Rơ Ngheo hiăng ti tăng, pro hdrê pêt dâng 1.000 châ̆u reăng rĭng kong ƀă reăng rĭng phong lan; tơkŭm po păn, rak vế 5 ngo reăng rĭng ƀă reăng sim. Ahdrối ai 5 rơpŏng tung pơlê ai ivá châ hnê tơdroăng tơdah tơmối koi tâm a kơmăng. Kuăn pơlê tung pơlê xuân hbrâ hên tơmeăm ki má môi, môi tiah chêng koăng – xoâng ƀă mâu kơchâi kâ dêi mơngế Rơteăng vâ tơdah tơmối ôm hyô.