Veăng rak vế, mơnhông mơdêk ki kơnâ khôi túa lĕm; hnoăng cheăng la ngiâ koh phiu ro leh tơbâ 40 hơnăm Hâi thái cô Việt Nam ƀă leh tơbâ 110 hơnăm mơjiâng kong pơlê Kon Tum, a kuât Kon Klor, bêng Thắng Lợi, Ƀơrô Hnê hriâm ƀă Hnê mơjiâng pơlê kong kơdrâm Kon Tum, kong pơlê Kon Tum tơkŭm po Tơ’noăng chêng koăng – kơhnhon xuăng ƀă tơ’noăng sâp ếo pơtâk hdroâng kuăn ngo ăm hok tro roh má VI hơnăm 2022.

Mâu um a Tíu tơkŭm po tơ’noăng

Tơ’noăng Chêng koăng – Kơhnhon xuăng ƀă tơ’noăng xâp ếo pơtâk hdroâng kuăn ngo ăm hok tro châ Ƀơrô Hnê hriâm ƀă Hnê mơjiâng pơlê kong kơdrâm Kon Tum rak tơkŭm po 2 hơnăm môi xôh. A tơ’noăng roh má VI hơnăm kố ai 16 khu ƀă vâ chê 1.100 ngế hok tro veăng. Tung pơla tơkŭm po tơ’noăng, ai lối 300 ngế hok tro veăng tŏn chêng koăng, 500 ngế hok tro kơhnhon xuăng ƀă vâ chê 250 ngế hok tro tơ’noăng mơđah xâp ếo pơtâk hdroâng kuăn ngo. Tâi tâng mâu vâi o pơrá cho hok tro râ má môi ƀă râ má péa ƀă ki hên cho mâu vâi o hdroâng kuăn ngo Bơhnéa.

Tơdroăng rak tơkŭm po Tơ’noăng chêng koăng – Kơhnhon xuăng ăm hok tro cho tơdroăng ki pơxúa dêi kơvâ hnê hriâm – hnê mơjiâng tuăn ngôa rơkê pơlê kong kơdrâm vâ rak vế, mơnhông ki kơnâ khôi túa lĕm, păn roăng hiâm mơno mâu vâi o rế hía rế ai hên troăng tơmiât pêi rơkê tro ƀă kum mâu vâi o hriâm tâp rơkê, ai tơmiât pêi lĕm tro.