A pơlê ki ối rak vế dêi khôi túa, vêa vong hdroâng kuăn ngo K’Ho, thôn Klong Trao 1, cheăm Gung Reh, tơring Di Linh, kong pơlê Lâm Đồng hiăng po tĭng kâ báu nếo dêi hdroâng kuăn ngo K’Ho Srê. Kố cho môi tung mâu leh mơdĭng ki kân má môi dêi mơngế K’Ho a Lâm Đồng, châ vêh mơnhông vâ pơtối rak vế, chôu ‘măn ƀă mơdêk mâu khôi túa vêa vong dêi hdroâng kuăn ngo a tíu kố.

Rơtế ƀă mâu vâi krâ pơlê, mâu ngế ki rơkê tôu chêng lo ing hên mâu pơlê cheăm dêi Gung Reh, Tân Nghĩa, Bảo Thuận, Liên Đầm, lối 100 ngế vâi rơtăm cho hdroâng K’Ho, cho mâu ngế ki ối tung Kâu lăk ƀô̆ tôu chêng dêi tơring Di Linh hiăng veăng rak vế ngăn tiô khôi hmâ roh vâi krâ nah tung tơdroăng po tĭng kâ báu nếo. O Tam Bộ Thùy, hdroâng mơngế K’Ho, ối a thôn Klong Trao 1, cheăm Gung Reh, tơring Di Linh tối ăm ‘nâi, kơnôm châ veăng kơhnhon xuăng, tôu chêng tung  mâu roh ki po mơdĭng kố, mê cho tơdroăng ki hơniâp ro kân khât. Kố châ ngăn cho ivá cheăng ki tơtro vâ o rơtế ƀă pú hmâ pơtối hriâm tâp, kring vế, rak ‘măn, ƀă pơtối mơdêk ki kơnía git dêi túa lĕm tro dêi hdroâng kuăn ngo tơná.

“Á tâ hlo hơniâp ro păng ‘nâng ƀă ro khât drêng veăng mơđah tôu chêng a roh ki vêh po tĭng kâ báu nếo dêi hdroâng kuăn ngo K’Ho tơná. Kơ’nâi la ngiâ, á xuân pói rơhêng vâ mâu kuăn ‘nĕng, khu vâi rơxông nếo chiâng kơhnhon xuăng, ‘nâi tôu chêng, kring vế khôi túa, vêa vong dêi hdroâng kuăn ngo tơná đi đo ăm rơxông pơtối kơ’nâi ah nếo”.

Tiô pôa K’Keo – Krâ pơlê, ối a thôn Hàng Làng, cheăm Gung Reh, tơring Di Linh, mâu hơnăm hdrối mê hía nah, Đảng ƀă Tơnêi têa đi đo tŏng gum, ngăn khât vâ khôi túa tôu chêng châ pơtối rak vế, châ mơnhông. Ôh ta xê to a mâu pơlê cheăm, tơdrá chêng ối châ hnê mơhno a mâu hngêi trung tung tơring. Kơnôm tiah mê, rế hía rế ai hên vâi hdrêng châ veăng hriâm tâp, châ hriâm tôu chêng a mâu Kâu lăk ƀô̆. Tơdroăng ki vêh mơnhông po tĭng kâ báu nếo mê cho môi tung mâu tơdroăng ki kơdo mơ-eăm dêi khu kăn pơkuâ hnê ngăn vâ hnê tối ăm kuăn cháu pơtối rak vế, châ tơrâng troh ton ta ah, vâ ga pôi ta tro hía.

“Tĭng kâ báu nếo cho leh mơdĭng tiô khôi hmâ, hiăng ai sap ing ton tĭn nah dêi hdroâng K’Ho. Nôkố, tơdroăng rêh kâ ối hiăng châ mơnhông, xua mê, rơtế ƀă khu kăn pơkuâ pói rơhêng vâ vêh mơnhông nếo khôi túa ki lĕm tro kố, pói rơhêng vâ mâu kuăn cháu la ngiâ ah drêng tơkŭm po leh mơdĭng kố tro tiô khôi túa vâi krâ hiăng hnê ‘măn ăm. Rơtế ƀă khôi túa, vêa vong tô chêng, tĭng kâ báu nếo châ vêh po gum ăm kuăn cháu hdroâng K’Ho thăm rế hlê  plĕng nhên tâ ‘na khôi túa lĕm tro dêi hdroâng kuăn ngo tơná vâ pơtối rak vế, ƀă  pơtối mơdêk”.

Tơdrêng ƀă tơdroăng rak vế, pơtối mơdêk ki kơnía lĕm tro ‘na tôu chêng, tơring Di Linh, kong pơlê Lâm Đồng ối tŏng gum tơ’lêi hlâu ăm Kâu lăk ƀô̆ tô chêng koăng a mâu pơlê cheăm veăng tô, mơđah, tŏng gum ăm tơdroăng ki ôm hyô pơlê pơla. Kố châ ngăn cho môi túa ki ôm hyô nếo, veăng gum thăm mơdêk tơdroăng pêi cheăng kâ-rêh ối pơlê pơla dêi kong pơlê vâ ga krá tơniăn ton tá ah.