A kơpong ôm hyô Tam Chúc, tơring Kim Bảng, kong pơlê Hà Nam, pôa Vương Đình Huệ, Kăn xiâm hnê ngăn Kuô̆k hô̆i veăng pơxiâm po Leh pơxiâm po Măng tĭng mơhno khôi túa lĕm tro, Ôm hyô Hà Nam hơnăm 2023 ƀă tơdroăng trâm mâ mơhno khôi túa lĕm tro ngê̆ thuât Việt Nam – Nhuk. Kố cho tơdroăng ki kơnâ kal khât tơmiât, pêi pro troh leh tơbâ 50 hơnăm mơjiâng tơrŭm tơpui kâ Việt Nam – Nhuk, kum pơ-ôu pơ-eăng ki lĕm khôi túa lĕm tro vâi krâ nah, tơrŭm cheăng, nhŏng o krá tơniăn pơla péa tơnêi têa, pơla péa kong pơlê Hà Nam ƀă mâu kong pơlê, khu tơrŭm cheăng kong têa Nhuk.

A roh leh, pôa Vương Đình Huệ, Kăn xiâm hnê ngăn Kuô̆k hô̆i hiăng teăng mâ khu râ kăn pơkuâ, Tơnêi têa diâp Pơkâ mơnhên 2 tơmeăm kơnía tơnêi têa ăm kong pơlê Hà Nam. Mê cho tơmeăm kơnía tơnêi têa Tơmeăm meăm ƀă hmốu hngêi chuô Giàu (cheăm Đinh Xá, pơlê kong kơdrâm Phủ Lý) ƀă Tơmeăm kơnía tơnêi têa hơkâ Tiên Nội 1 (tung tơmeăm ti tăng vâ rak 16 to dêi Tíu chôu ‘măn tơmeăm khoăng ton nah kong pơlê Hà Nam).

Tơdrêng amê, Khu xiâm pơkuâ ‘na mơhno túa lĕm tro, Tơ’noăng ivá ƀă Ôm hyô hiăng diâp pơkâ ối tiô râ tơmeăm kơnía git ton nah râ tơnêi têa ƀă 4 tơmeăm ton nah dêi Hà Nam.