Tiô khu râ kăn pơkuâ Vi ƀan kong pơlê Dak Lak, hơnăm 2024, cheăng kâ Dak Lak mơhé ối hên pá puât ƀă ôh tá châ pơkâ mơ’no. Laga, ƀă tơdroăng mơ-eăm dêi tâi tâng khu cheăng kal kí, kong pơlê hiăng châ mâu tơdroăng châ tơƀrê hôm păng ‘nâng. GRDP tơdâng pơ’leăng mâ mơngế châ 72,8 rơtuh liăn, tâi tâng xo hnoăng liăn ngân châ 8.500 rơtal liăn; tâi tâng pêi lo liăn tê ngi kong têa ê châ 1 rơtal 650 rơtuh dollars; ki kơnâ tâi tâng tơmeăm tung kong pơlê tiô yă nôkố châ lối 141 rơpâu rơtal liăn, ối má môi kơpong Tây Nguyên.

Tung tơdroăng châ tơƀrê mê, khu tuăn ngôa rơkê, văn ngê̆ sih ƀă khu chêh hlá tơbeăng hiăng ai hnoăng kal drêng đi đo tơmiât pêi rơkê – pêi pro tơdroăng mơhnhôk hâk vâ, teăm tơdrêng tơdroăng nếo tŭm tơdroăng rêh ối, cheăng kâ rêh ối pơlê pơla, mơhnhôk hiâm mơno tơmiât pêi rơkê, pơhlêh nếo ƀă mơnhông, gâk kring ki kơnâ lĕm ƀă mơhno tơdroăng ki ôh tá lĕm, ối tơvâ. Kong pơlê Dak Lak xuân dế tơmiât troh môi hơnăm 2025 ƀă hên roh tơ’lêi nếo tung mơnhông cheăng kâ, khôi túa lĕm, khoa hok kŏng ngê̆.

Mâu kơvâ kố ôh tá păng lôi tơdroăng rơtế ƀă veăng kum dêi khu mâu ngế tuăn ngôa rơkê, văn ngê̆ sih, ngế chêh hlá tơbeăng. Teăng mâ khu râ kăn pơkuâ kong pơlê Dak Lak, pôa Nguyễn Tuấn Hà, Phŏ Kăn hnê ngăn hnê mơhno má môi Vi ƀan kong pơlê Dak Lak hiăng pơtroh rơkong rơkâu troh tâi tâng mâu ngế tuăn ngôa rơkê, văn ngê̆ sih ƀă khu chêh hlá tơbeăng, pói vâ hơnăm 2025 kô pơtối cho môi hơnăm châ tơƀrê, ƀă hên tơdroăng veăng kum ki kal ăm tơdroăng mơnhông dêi Dak Lak ƀă tơnêi têa.