Pơtối mâu tơdroăng po leh a Dak Lak, kơxo hâi lơ 6/10, Khu xiâm ngăn tơdroăng nếo ai ƀă hlá tơbeăng hyôh rơ‘jiu internet kong pơlê Dak Lak tơrŭm ƀă Vi ƀan tơring Čư̆ Kuin  pơxiâm po lăm mơđah um ukố umê tơmeăm tối ‘na “Hoàng Sa, Trường Sa dêi  Việt Nam - mâu um tơmeăm ăm hlo ai sap ing nah ƀă ki tro luât”. 

Kố cho rôh mơđah ukố umê um tơmeăm rôh má  6 châ tơkŭm po a mâu cheăm, tơring a kong pơlê Dak Lak. Khu tơkŭm po hiăng mơđah tơbleăng mâu um tơmeăm ki kal xua Khu xiâm ngăn tơdroăng nếo ai ƀă  hlá tơbeăng hyôh rơ ‘jíu internet tơbleăng ăm, ƀă 6  tơdroăng ki kal, mâu  um, hlá mơ-éa chêh ‘na  chuăn Hoàng Sa hdrối hơnăm 1875.

Mâu um hlá mơ-éa chêh ‘na chuăn Trường Sa nôkố ƀă mâu tơdroăng cheăng pêi dêi mâu kăn ƀô̆, mâu lêng têa kơxĭ, kuăn pơlê rêh ối a chuăn Trường Sa. Rôh kố, ai lối 1 rơpâu 600 ngế hok tro Hngêi trung râ má pái Y Jut ƀă kơdrâm kuăn pơlê a tơring Čư Kuin hiăng troh veăng ngăn, tăng hlê plĕng ƀă vâ ‘nâi nhên ‘na hnoăng pơkuâ chuăn, rơlố , malối cho ƀă péa chuăn Hoàng Sa ƀă Trường Sa dêi Việt Nam pơkuâ.