Nâ Hán Thị Kim Sương ối a pơlê Chăm Hậu Sanh, cheăm Phước Hữu, tơring Ninh Phước tâ hâk vâ drêng roh apoăng châ veăng hriâm ƀă tơdroăng dó inâi xúa tơmeăm kơnía khôi túa lĕm Chăm vâ mơnhông mơdêk krá tơniăn veăng amê ai pơlê pơla, xua Hô̆i đong kong têa Ăng-glê tơrŭm ƀă Tíu xiâm mơhno túa lĕm tro Chăm Ninh Thuận tơkŭm po.

Lâm hriâm ai 35 ngế, lo ing pơlê meăn pro tơmeăm khoăng ƀă tơnêi hneăn Bàu Trúc, pơlê teăn ếo pơtâk hdroâng kuăn ngo Mỹ Nghiệp ƀă mâu pơlê ai tơmeăm khoăng ton nah thôt Chăm.

Nâ Hán Thị Kim Sương tối:

“Tung pơla kố nah, drêng châ pơtâp á tâ hlo pơxúa ‘nâng vâ á kô ‘nâi ‘na mơnhông ôm hyô pơlê pơla kơnôm a khôi túa lĕm hdroâng kuăn ngo Chăm tơná. Á pơlê á ai thôt Pôrôme, xua mê, á xuân tơbleăng vâ tơmối lăm ngăn thôt Pôrôme. Vâ tơmối châ hlo ‘na tơdroăng mơnhông mơdêk ôm hyô a kong pơlê tơná’’.

Ƀă mâu thôt Chăm pá kĭng ki lĕm krip, rơtế ƀă mâu leh mơdĭng tiô khôi vâi krâ nah châ tơkŭm po rêm hơnăm ƀă mâu pơlê pêi cheăng tiô khôi vâi krâ nah pơlê teăn ếo pơtâk Mỹ Nghiệp, pơlê mĕn tơmeăm ƀă tơnêi hneăn Bàu Trúc, tâng châ pêi pro lĕm kô cho mâu tíu troh ki lĕm ro, vâ Ninh Thuận xúa mâu tơmeăm kơnía mơhno khôi túa lĕm tro Chăm mơnhông mơdêk ôm hyô pơlê pơla.

‘Na tơmeăm mơnhông mơdêk ôm hyô pơlê pơla châ tơƀrê, nâ Phạm Thu Nga, Hô̆i đong Ăng-glê tối ăm ‘nâi:

“Rơtế ƀă tơdroăng veăng pê dêi pơlê pơla mê ngin loi tơngah mê cheăm kô pơtối mơnhông mơdêk ki kơnâ khôi túa lĕm tro vâi krâ nah xuân môi tiah pêi pro mâu tơdroăng rế rak vế, mơnhông mơdêk ki kơnâ khôi túa lĕm pơtối tŏng kum pơlê pơla a pơlê mơnhông cheăng kâ kơnôm ing tơmeăm ki kơnâ mơhno khôi túa lĕm dêi pơlê tơná”.

Nôkố mâu tíu troh môi tiah pơlê mĕn tơmeăm khoăng ƀă tơnêi hneăn Bàu Trúc, pơlê teăn ếo pơtâk Mỹ Nghiệp tơdâng rêm hâi ai lối 300 tơmối troh lăm ngăn. Krê thôt Pô Klong Girai, rêm hơnăm mơhnhôk dâng 120 rơpâu ngế tơmối ôm hyô. A pơlê mĕn tơmeăm ƀă tơnêi hneăn Bàu Trúc, pakĭng mĕn tơmeăm khoăng ƀă tơnêi hneăn ôh tá ai kơƀăng mơdá mê tơdroăng xo tơnêi hneăn vâ meăn pro tơmeăm ƀă kih thuât pôh, mơdá xuân phá tơ-ê pro ăm tơmối hâk vâ ngăn.

Drêng troh pơlê mĕn tơmeăm khoăng ƀă tơnêi hneăn Bàu Trúc, ƀă tơdroăng châ hlo mĕn pro tơmeăm ƀă tơnêi hneăn rơtế mâu ngê̆ nhân, tơmối cho mơngế kum mơđah tơbleăng tơmeăm ki mĕn ƀă tơnêi hneăn dêi mơngế Chăm Bàu Trúc troh ƀă rêm kơpong tơnêi têa pin.

Ngoh Siêu HRiêng môi ngế tơmối ôm hyô a kong pơlê Gia Lai hơ’muăn:

“Tung pơla lăm ngăn a pơlê mĕn tơmeăm khoăng ƀă tơnêi hneăn Bàu Trúc, á châ hlo hên tơmeăm cho xiâm kối vâ mơdêk chiâng ôm hyô pơlê pơla. Môi tung mâu tơmeăm ki kân má môi cho tơmeăm mĕn ƀă tơnêi hneăn Bàu Trúc. Drêng tơmeăm mĕn ƀă tơnêi hneăn Bàu Trúc châ UNESCO mơnhên cho tơmeăm ki kơnâ lâp plâi tơnêi mê cho môi tơmeăm ki kân tâng pơlê pơla Chăm a Bàu Trúc kô chiâng tơdjêp ƀă mâu pơlê pơla ki ê lơ mâu ngê̆ nhân tơrŭm ƀă khôi túa lĕm tro hơdruê xuăng vâ mơnhông ôm hyô pơlê pơla Bàu Trúc’’.

Sap ing péa hơnăm kố, a pơlê mĕn tơmeăm khoăng ƀă tơnêi hneăn Bàu Trúc hiăng mơjiâng Khu pêi ôm hyô pơlê pơla ƀă tŭm mâu rôh pêi cheăng môi tiah: Tôh tơdah tơmối, tôh pế pơchên kơchâi kâ, tôh mĕn tơmeăm khoăng ƀă tơnêi hneăn, tôh hơdruê xuăng ƀă hía hé. Kơnôm mâu tơdroăng pêi cheăng rơkê mê Khu pêi ôm hyô pơlê pơla Bàu Trúc ôh tá xê to tơdah tơmối troh ôm ngăn a pơlê pêi cheăng tiô khôi vâi krâ nah mê ối châ krếo lăm mơđah tơbleăng, mơhno mâu tơmeăm ki mĕn ƀă tơnêi hneăn hdroâng kuăn ngo Chăm a hên kong pơlê tung lâp tơnêi têa.

Nâ Đàng Thị Ngọc Ngà, Kơpong kơphô̆ Bàu Trúc, pơlê kân Phước Dân, tơring Ninh Phước, Ninh Thuận tối ăm ‘nâi:

“Sap ing hâi Khu pêi ôm hyô pơlê pơla pơlê Bàu Trúc châ mơjiâng. Ngin châ hnê mơhno, pơtâp mâu vâi o troăng pêi ôm hyô pơlê pơla. Pro ti lâi vâ tơmối ôm hyô hâk ro, troh lăm ngăn, ti tăng plĕng ‘na khôi túa lĕm tro dêi hdroâng Chăm. Ing mê, tơbleăng tơmối ôm hyô tung tơnêi têa ƀă a kong têa ê ‘nâi hên khôi túa lĕm dêi mơngế Chăm’’.

Xúa mâu tơmeăm ki kơnía git, khôi túa lĕm tro vâ mơnhông ôm hyô pơlê pơla a mâu kơpong vâi krâ hdroâng kuăn ngo Chăm Ninh Thuận hiăng mơjiâng hên ƀă pêi lo liăn ăm kuăn pơlê. Rơtế ƀă mâu tơmeăm ôm hyô nôkố ai a Ninh Thuận, ôm hyô ti tăng plĕng tơmeăm kơnía mơhno khôi túa lĕm tro Chăm hiăng chiâng môi tơmeăm ôh tá păng lôi ƀă tơmối ôm hyô tung tơdroăng prôk ôm hyô troh ƀă kong pơlê Ninh Thuận.

Tơmeăm kơnía mơhno khôi túa lĕm tro Chăm tâng châ tơdjêp ôh tá xê to kum mơnhông mơdêk ôm hyô mê ối kum mâu pơlê mơnhông mơdêk, kum rak vế ƀă mơnhông mơdêk ki kơnâ khôi túa lĕm tro tung hneăng nôkố.