Kơxo lơ 30/5, a pơlê kong kơdrâm Ƀuôn Ma Thuột, kong pơlê Dak Lak, Rơ’jiu xiâm Việt Nam tơrŭm rơtế ƀă Khu tơrŭm kơtu ƀa long Việt Nam tơkŭm po rôh tơ’noăng Futsal HDBank Sinh viên kơpong Tây Nguyên 2023. Rôh tơ’noăng  Futsal HDBank Sinh viên kơpong Tây Nguyên 2023 po sap ing hâi lơ 30/5 troh lơ 11/6 tung mê ai 9 đô̆i lo ing mâu hngêi trung Kao đăng, Đăi hok tung kong pơlê kơpong Tây Nguyên.

Rôh tơ’noăng kô tơ’noăng tiô luât Futsal dêi FIFA ƀă túa pơkâ dêi Khu tơrŭm Kơtu ƀa long Việt Nam rơtế ƀă tơdroăng pơkuâ dêi mâu trọng tài tơnêi têa. Tơdroăng tơ’noăng: 09 đô̆i kơtú ƀa long châ klâ bro 2 bảng (bảng A: 05 đô̆i, bảng B: 04 đô̆i) tơ’noăng tâ tá môi rôh riân điêm. Rah xo mâu đô̆i ki ối má môi ƀă má péa a rêm bảng tơ’noăng Bán kết, Chung kết.

Tơdroăng tơkŭm po Futsal sinh viên kơpong Tây Nguyên 2023 pơxiâm tơ’noăng khât hdró rôh apoăng tơ’noăng Futsal sinh viên châ tơkŭm po tiô kơpong tơmiât troh ki xiâm cho tíu ki xah hêi Futsal lâp tơnêi têa ăm sinh viên, ăm mâu hơnăm ối nếo, ƀă mơđah tơbleăng rơdâ tâ nếo môn Futsal.