Kơmăng hâi lơ 2/6, hiăng po Leh mơdĭng pĕng mlŏi reăng Lâp plâi tơnêi a Đà Nẵng hơnăm 2023 -DIFF 2023. Ƀă pơxá “Hơniâp ro ăm kuăn mơngế”, kơmăng pơxiâm po DIFF 2023 pơxá inâi tơdroăng mơđah ki ro rơtế ƀă 2 rôh pĕng mlŏi reăng dêi 2 khu Việt Nam ƀă Phần Lan ngăn môi tiah um kơchuâ ki chiâng tơdro ‘na tơdroăng tơrŭm, môi tuăn ƀă hơniâp.

Kơmăng pơxiâm po ối mơđah hơdruê xuâng ki ro tơviah, kum mơngế ki ngăn châ hlo ‘nâi túa lĕm tro tung lâp plâi tơnêi, tung môi rôh mơđah tơbleăng. Tối tơbleăng a hâi leh pơxiâm po, pôa Lê Trung Chinh, Kăn xiâm hnê ngăn Vi ƀan pơlê kong kân Đà Nẵng, hlối cho môi tung mâu tơdroăng pơloăng mơnúa vâ pơlê kong kân ôh tá la lâi pơtê mơ-eăm, pơtối mơdêk ki tơƀrê tơkŭm po ƀă mơđah vâ mơjiâng inâi Leh mơdĭng pĕng mlŏi reăng Lâp plâi tơnêi Đà Nẵng. Tơdroăng kố, rế tơxâng ƀă tơdroăng tơngah dêi rêm ngế. Klêi tơbleăng pơxiâm po leh  cho rôh  đô̆i Việt Nam pĕng mlŏi reăng.