Rơhé alâi cho kế kâ ki tiah hmâ rêm hâi, cho tơmeăm dêi tơrŭm hên hnoăng cheăng ƀă hiâm mơno mơjo kơhnâ khât tơdroăng cheăng dêi hdroâng mơngế K’Ho. Vâ khoh ai ‘noăng alâi ki kơhiâm, ngeăm, vâi krâ-nhŏng o athế rah xo hdrê ki dâi lĕm, hdrê alâi ‘nhiăn lơ hdrê alâi kong ê ki ngeăm, ki hơ-iâ, tơdroăng ki pêi pêt, rak ngăn alâi mê châ pêi pro krâu, kơhnâ khât. Jâ K’Bri, ối a cheăm Đinh Văn Lâm Hà, kong pơlê Lâm Đồng tối ăm ngin ‘nâi:

“Drêng alâi hiăng krâ, mê pin athế lăm hnôa, đôu dêi alâi, klêi mê, vâi têng dêi pơ’leăng alâi ăm i khăng a drá peăng lơ têng a plông pá gong dế kong tôu, klêi mê, vâi krí dêi alâi, djâ lăm uâ, mê pin hiăng ai phái alâi vâ pế pơchên ki kơhiâm”.

Mâu pơ’leăng alâi mê, klêi kơ’nâi uâ, ôh tá xê uâ liê, mê bu uâ ăm ga hdrê hdrêng, ki mê vâi tối dêi cho “phái alâi”. Phái alâi ki mê vâi xuân ối lôi ti mê ôh tá tơvât, lơ tâm ƀă ki klâi ôh, vâ ga pơtối ối châ rak dêi ki xú kơhiâm, xua mê, klêi kơ’nâi pế, rơhé mê ôh tá xê to poh rơbĕn lĕm mê ối pro ki xú kơhiâm dêi alâi. Tơdroăng ki pế “phái alâi” mơngế ki pro, sap ing uâ troh a pế pơchên kal athế mơdoh hên chôu phut ƀă pế krâu khât. Vâ pơ’leăng alâi rĕng chên ƀă poh lĕm, mơngế K’Ho hmâ tâm dêi pơ’leăng alâi tung têa chía ton, ki tro má môi athế tâm luâ môi măng.

Klêi kơ’nâi tâm pơ’leăng alâi mê, vâi hmâ rơchâ krâ kơvâ, klêi mê, râm tung hdro, pế pơchên pá pêng kơnoh on, ‘mâi on krâ kơvâ tung pơla to lâi chôu. Tung pơla pế mê, mơngế ki pế athế rơvâl đi đo vâ rơhé chên tơ’mô, ƀă ôh tá tro khoăng a krí hdro. Ngoh Ha Zu Na, ối a cheăm Đinh Văn Lâm Hà, kong pơlê Lâm Đồng tối ăm ngin ‘nâi:

“Rơhé alâi kố á pế ga tơ’lêi tê, ôh tá xê xúa phái, ôh tá pế tơvât ƀă kơxêng mâm. Alâi ki hiăng uâ mê chiâng pơ’leăng ki hdrê hdrêng, á rơchâ alâi ăm i krúa ƀă lếo têa, pế a kơpêng kơnoh on tơkôm rơhé hiăng tơkâ lĕm ah, mê pơ’leăng alâi kô poh. Mơngế K’Ho hmâ pế dêi tiah mê, vâ ga ối rak ki kơhiâm dêi alâi”.

Rơhé alâi vâi hmâ kâ tơvât ƀă ká măm khăng ki pêi, ká âp, ká têa kroăng ki hiăng pôh xú kơhiâm lĕm rơtế pế ƀă kơchâi kong ki âp lơ kơ-óu ƀă têa rơmâ, hơ-iu ƀă po pêi ƀă hăng. Mâu hdrê kơchâi kong ƀă rơhé alâi ga tơmot dêi pó, ing mê, mơjiâng chiâng kế kâ ki kơhiâm, vâ tối ‘na ki tơviah krê dêi kong kế, ki kơhiâm, hơ-iâ ó khât. Nâ K’Huyên, ối a cheăm Đinh Văn Lâm Hà, kong pơlê Lâm Đồng tối ăm ngin ‘nâi: mâu hdrê kơchâi ƀă mâu kơchâi hĕm hŏm ki kâ tơdjuôm ôh ta xê to vâ pro ki kơhiâm, hơ-iâ krê dêi mâu kế kâ dêi mơngế K’Ho.

“Drêng á kâ, á hmâ kâ rơtế ƀă rơhé alâi kố, ki tâ apoăng mê ga hơ-iâ, ki ngeăm dêi alâi. Rơhé ki tơkâ, pơ’leăng alâi poh ƀă kâ ga tơ’lêi hui. Ki nhên ga, ôh tá xê pế ƀă kơxêng mâm ki pế ngé ton ƀă phái alâi, laga xuân ối hơ-iâ, ƀă kơhiâm krê kơnôm ing ki kơhiâm dêi alâi”.

Rơhé alâi cho kế kâ ki hmâ trâm, hmâ hlo rêm hâi a mâu rơpŏng hngêi, mơhno tối ‘na tơdroăng ki rêh kâ ối tiah hmâ, mê ối cho vâ mơhno tối ki rơkê dêi mâu hdroâng K’Ho “ai ki klâi kâ ki mê”, hmâ tí tăng kêi kơchâi tung kong vâ pế tơvât, kâ mâu tơmeăm tung kong ki hiăng ‘măn ăm. Rơhé mê vâi hmâ kâ klêi kơ’nâi pêi chiâk pêi deăng tơbrê tơbrêh, gum ăm mơngế ki pêi cheăng mê tâ phâi phok, vêh mo dâi lĕm, tâ tung châ rơngiâp lĕm, môi tiah kế kâ ki kơnía dêi plêng tơnêi hiăng ‘măn ăm klêi kơ’nâi tí tăng tơdroăng cheăng kâ-rêh ối.

Tung tơdroăng rêh ối dê trâm hên ki tơbriât tơxup cheăng kâ, mơdró kâ dêi mơngế a kơphô̆, drêng mâu kế kâ ki pế bro tiô chal nếo hiăng châ lân rơdâ troh a mâu pơlê cheăm, “rơhé alâi” cho kế kâ ki tơviah hmâ dêi mơngế K’Ho xuân u ối châ rak tung mâu pơlê cheăm, ing mâu rơxông, chal hdrối nah troh nôkố. Tung rêm mơngĕn rơhé, ôh ta xê to kâ tâ kơhiâm, hơ-iâ dêi alâi, ki xăng i iâ dêi po, mê ối cho vâ mơhno tối tơdroăng ki mơjo pâ dêi hâi khế, dêi tơdroăng hiăng hmâ roh hdrối mê hía nah. Mơngĕn, hơtâu rơhé mê ôh tá xê bu pro vêh mo lĕm ivá châ chăn klêi kơ’nâi môi hâi pêi cheăng, pêi chiâk pêi deăng tơbrê tơbrêh mê ối pro ăm mơngế ki kâ mê chôu vế, pâ vế dêi pơlê xiâm, khíu pâ dêi kơnoh on, ngôi on, hơpiâp on, chôu vế, khía pâ dêi ngế nôu, ngế jâ ki mơjo pâ, rơ-ui phĕng.