Ing kơxo má, peăng pá ngiâ plông hngêi trá tơkŭm hôp dêi ƀuôn Ky kơdrâm kơdrĕng kuăn pơlê vêh troh akố. Vâi droh rơtăm vâi kum ngê̆ nhân, vâi krâ túa ki ‘măn chôu chêng koăng. Mâu vâi droh rơpâ rơmuăn kơhnhon xuăng, châ chăn rơnuâ ếo pơtâk tiô khôi hmâ vâ veăng rơkâu xối xeăng.

O H’By La Ƀyă phiu ro ai tối tiah kố:

‘’Kố cho roh apoăng á veăng tĭng rơkâu xối kong mêi, xua mê á xuân tá hâi teăm ‘nâi hên tơdroăng, la á hlo hơniâp ro khât drêng châ veăng lăm a tĭng rơkâu pâ kong mêi kố. Tĭng rơkâu xối kong mêi kố ai hên khôi túa, vêa vong ki krê xêh dêi mơngế Rơđế’’.

Peăng pá kơdâm xâp loăng ki kân, kuăn pơlê hiăng hbrâ hơkôp ƀă mâu tơmeăm ki xúa vâ rơkâu pâ kong mêi. Môi to hơkôp cho rơkâu xối cho rơkâu xối kơ khu pôa xeăng ƀă jâ xeăng, tơdrêng ƀă mâu tơmeăm hdroăng ki kal vâ pleăng ăm khu xeăng. Hơkôp achê mê, cho hơkôp ki ‘măn alâi, báu. Peăng pá kơdâm hơkôp cho um méa ki pro xeăng kiâ ‘mêi, ngế ki tro pơxâu phak xua hiăng thế khu chêm, kuăn kiâ kong mot kâ ‘nhê chiâk deăng, pro tơ’nhê báu prá, alâi.

Pakĭng mê, cho mâu tơmeăm hdroăng vâ rơkâu xối xeăng môi tiah drôu xiâm, í, tơmeăm ki tĕn pro ƀă kơlá, phêa rơtế ƀă mâu um loăng ki pro um méa ku kŭn môi tiah pro um rui, imá, klá ƀă hía hế.

Klêi kơ’nâi vâi tŏn chêng koăng, pôa pơchâu pơxiâm rơkâu xối tiô tơdroăng ki vâi krâ roh nah hiăng hnê, ƀă tơdroăng ki pói rơhêng vâ ăm mêi tro tô ‘ló, châ pêi lo hên báu phái, prá alâi, tơdrêng amê, hnối troh tah lôi khu kuăn kiâ ki kâ ’nhê báu prá alâi, troh tah khu kiâ ’mêi rơtôh, kiâ mơdroh lo châ hơngế ing pơlê cheăm.

Klêi kơ’nâi rơkâu xối, pôa pơchâu hvêa chêng, kơchuâ a tơnêi mâu troăng ki vâ pơto pơtih cho klâng chiâk, klêi mê, pro mơhno bô bối tơdroăng chối báu, kơ’neh hdrê. Pôa prôk ahdrối, péa pâ kŏng râng 2 to loăng ki ki hiăng ‘nhuăn ‘nhíu, môi tiah loăng xâng vâ xâng a tơnêi, prôk pơtối mê cho vâi kơdrâi, vâi droh Rơđế kơ’nêh hdrê báu tung pơlôu xâng mê. Klêi kơ’nâi ai kong mêi ruih, rêm ngế pơrá tríu mơdêi, hơniâp ro mot tung rơnó pêi chiâk deăng ki nếo…

Veăng lăm ngăn a roh tĭng rơkâu kong mêi mê, jâ H’Luêch Hđơk, 65 hơnăm, hơniâp ro tối:

‘’Á ƀriê phoih tung hiâm mơno ƀă hlê plĕng hên tơdroăng, xua ga, á hlo po mơdĭng kố tro tiô khôi hmâ dêi hdroâng Rơđế, mê cho, rêm hơnăm tơkŭm po môi hdroh hdrối vâ kơ’nêh hdrê alâi, chối báu, xua rơxông vâi krâ roh nah vâi hmâ rak vế dêi tiah mê. Á vêh chôu vế tơdroăng ki á ối tơxĭn nah, xuân ối veăng lăm ngăn hâi ki rơkâu xối kố, nôkố hiăng xông kân, á hlo vâi krâ ối rak vế khôi túa kố cho hơniâp ro khât’’.

Tiô pôa Y Ƀang Ƀyă, Krâ pơlê ƀuôn Ky, bêng Thành Nhất, pơlê kong kơdrâm Ƀuôn Ma Thuột tối, hdrối nah, tĭng rơkâu xối kong mêi mơngế vâi krâ Rơđế hmâ pro a rơnó tô mơdrăng, khăng khoăng, klêi kơ’nâi hiăng trăm, chôu, muih dêi tâi tâng chiâk deăng, nôkố tíu ki mê hiăng chiâng kơdrum kơphế, tiu, hên kuăn pơlê hiăng châ dêi pơlê ton vâ lăm rêh ối a pơlê kong kân, a kơphô̆ vâ tí tăng mơdró kâ, xua mê, tơdroăng rơkâu xối rế hía rế vâ hía long lôi.

Laga, mâu hơnăm achê pơla kố, kơnôm ai tơdroăng tŏng kum dêi tơnêi têa, pơlê cheăm hiăng châ vêh po nếo tơdroăng leh, tĭng tiô khôi hmâ, vêh rak vế dêi khôi hmâ, vêa vong hdroâng kuăn ngo tơná, ing mê vâi krâ-nhŏng o khoh pơtối châ rak vế dêi khôi túa, vêa vong hdroâng kuăn ngo tơná lĕm tro tâ:

‘’Tro klăng tâng vâ rak vế, pêi pro tro tiô khôi túa, vêa vong dêi hdroâng kuăn ngo tơná cho tơdroăng ki pá má môi ƀă ƀuôn Ky, la kơnôm ai tơdroăng veăng kum dêi khu kăn pơkuâ ngăn bêng Thành Nhất hiăng kum liăn ngân vâ thôn pơlê tơkŭm po tĭng rơkâu xối kong mêi Rơkâu xối kong mêi ga ai pơxúa cho kuăn pơlê pói tơngah hơnăm kố báu prá alâi chiâng dâi lĕm, tơdroăng rêh ối kuăn pơlê rế hía rế lĕm tro tâ, phâi tơtô tâ, kuăn pơlê Tây Nguyên xông tơtêk krá tơniăn’’.