Hiăng rơkê khât tung tôu mơđah mâu ƀai chêng a ngiâ mâu tơmối, klêi mê, koai phim, xup um mâu tơdroăng xah ôm hêi ƀă tâ tơbleăng tung mâu măng facebook, zalo, Y Justin Adrơng, ối a ƀuôn Kmrơng Prong A, cheăm Ea Tu, pơlê kong kơdrâm Ƀuôn Ma Thuột, hơniâp ro. Ngoh Y Justin ai tối tiah kố:

“Á châ hriâm túa tôu chêng koăng, vâ koai phim, xup um vâ mơhno tơbleăng chêng koăng, ai pơxúa kân khât ăm tơná á ƀă ăm tâi tâng mâu hdroâng kuăn ngo a Tây Nguyên ai tơdroăng ki mơđah tŏn chêng koăng kố. Ai mâu um lơ mâu túa cheăng, túa koai phim, xup um, xuân chiâng vâ xo um ki mê, video ki mê vâ ngin pơtối rak vế ƀă pơtroh tơbleăng ăm rêm ngế”.

Xúa mâu um cho vâ hơ’muăn tối ‘na khôi túa, vêa vong dêi hdroâng kuăn ngo, ối tối cho Photo Voice, cho môi tung mâu túa pro ki châ Khu xiâm ngăn ‘na Túa lĕm tro, Tơ’noăng Ivá ƀă Ôm hyô pơkâ pro a Dak Lak ing mơ’nui hơnăm 2024, kơnôm ing túa ki tơdjêp tơmeăm khoăng, tơdroăng ki lĕm tro “Tíu ki rak vế ƀă mơđah tôu chêng koăng Tây Nguyên tung hnoăng gum mơnhông ôm hyô ‘na tơmeăm khoăng Ƀuôn Ma Thuột – Dak Lak”. Tơdrêng amê, mâu ngế ki hriâm ối châ hriâm tôu chêng koăng ing tơdroăng ki tơ’lêi hlâu troh a tơdroăng ki pá tâ, ‘mâi rơnêu mâu tơdroăng ki hmâ trâm ôh tá hâi tơtro tung tôu chêng koăng, tí tăng ‘nâi plĕng tơ’nôm tơdrá chêng koăng chal vâi krâ roh ton nah dêi hdroâng Rơđế ƀă hên hĕng mâu tơdroăng ki ê. Pôa Y Bây Kƀuôr, ối a ƀuôn Kmrơng Prong A, cheăm Ea Tu, pơlê kong kơdrâm Ƀuôn Ma Thuột tối tiah kố:

“Hdrối nah, ing mâu ƀai chêng dêi mơngế Rơđế ôh ta hâi châ hriâm tŭm tâi tâng trối roh kố. Ing mâu lâm ki hnê mê, á hlo mâu vâi o, vâi muăn hiăng klê nhên tâ ‘na ki kal dêi chêng koăng Tây Nguyên, pơrá ‘nâi ƀă hriâm mâu ƀai, mâu tơdrá chêng xua ngoh nâ, pâ pôa pin roh nah hiăng hnê chôu ăm”.

Tuá ki tơdjêp mâu tơmeăm khoăng, mâu tơdroăng ki ai tơdjâk troh ‘măn rak, pơtối mơđah tôu chêng koăng tung tơdroăng ôm hyô cho tơdroăng cheăng Tơkêa bro kơxô̆ 6, Hnoăng cheăng xiâm tơnêi têa mơnhông pêi cheăng kâ, rêh ối pơlê pơla kơpong hdroâng kuăn ngo ki iâ mơngế ƀă kong ngo, hneăng hơnăm 2021-2030. A Dak Lak, túa ki pêi pro kố châ pêi pro a mâu pơlê tung cheăm Ea Tu, pơlê kong kơdrâm Ƀuôn Ma Thuột.

Bu kơ’nâi 1 khế pơkâ pêi pro, hiăng ai 60 video, lối 100 kơtâ um xua tơná kuăn pơlê koai, xup xêh, cho mâu tơdroăng ki hơ’muăn tối ƀă um, ƀă phim tơtro tiô tơdroăng ki hmâ trâm, hmâ hlo, tiah hmâ, achê ƀă tơdroăng rêh ối, pêi cheăng rêm hâi. Pôa Lại Đức Đại, Phŏ Kăn ngăn ‘na Túa lĕm tro, Tơ’noăng Ivá ƀă Ôm hyô kong pơlê Dak Lak tối tiah kố, túa pêi pro ki nếo kố hiăng châ mơdêk ki tơƀrê khât ƀă hnoăng cheăng chôu ‘măn, rak vế, mơnhông ki kơnía dêi Tơdroăng rak vế, pơtối mơnhông mơđah tôu chêng, tŏn koăng Tây Nguyên, vâ ing mê chiâng ivá cheăng ăm tơdroăng ôm hyô pơlê pơla.

“Pơtối tơdjâ tơdroăng ki ƀlêi chiâng dêi túa ki kố, tơdrêng ƀă tơdroăng ki tŏng gum, ngăn khât dêi Khu xiâm ngăn ‘na tơmeăm khoăng chal krâ, dêi Khu xiâm ngăn ‘na Túa lĕm tro, Tơ’noăng Ivá ƀă Ôm hyô, tung hơnăm 2025, Khu kố kô hnê mơhno ăm mâu ƀơrô cheăng, mâu kong pơlê, pơlê kong kân chêh dêi inâi pơtối rak vế, pêi pro mâu túa cheăng ki kố a mâu tơring, cheăm dêi kong pơlê Dak Lak. Kô ai tơdroăng ki tơrŭm cheăng krá kâk tâ, pơkâ pêi pro hên túa cheăng tơdrêng môi xoh, mâu lâm ki mê kô pơtối dêi pó rơtế veăng pêi pro mâu túa ki hnê mơhno tối dêi mâu ki hriăn plĕng, mâu vâi krâ ki rơkê tơdroăng cheăng”.

Rơtế ƀă Dak Lak, mâu lâm ki hnê mê xuân châ tơkŭm po a mâu kong pơlê Gia Lai, Kon Tum ƀă Tây Ninh, gum ăm mâu kuăn pơlê mâu hdroâng kuăn ngo rak vế, pêi pro. Tơdroăng ki hnê mê xua mâu vâi krâ-nhŏng o ki hiăng rơkê ton hơnăm ƀă châ loi tơngah tung pơlê pơla ki hnê pơtho, vâi kơ hnê mâu ƀai, mâu tơdrá, ai túa ki tôu chêng tơtro, ai tá tơdroăng ki mơđah ‘ló tơdroăng. Tio Tiê̆n sih Nguyễn Thị Thu Trang, Kăn Ƀơrô pơkuâ ‘na tơmeăm khoăng túa lĕm tro ‘na tơmeăm khoăng, cheăng tung Khu Rak vế tơmeăm khoăng Tuá lĕm tro tối, drêng hiăng châ hnê pơtho, mâu vâi o, vâi muăn kô châ hlê plĕng tơ’nôm tung tơdroăng ki vâ xúa, tơdroăng ki tôu chêng koăng vâ mơđah ăm tơmối tăng liăn rêh kâ ối, mơnhông ăm tơdroăng ki hlê plĕng pơlê pơla, hnối pơtối rak vế, mơnhông dêi khôi túa, vêa vong chal vâi krâ roh nah ki lĕm tro.

“Tơdroăng ki tơrŭm tơdjêp pơla mâu pơlê pơla rơtế ai tơmeăm khoăng, vêa túa ki vâ bô bối, vâ trối dêi pó, tơdroăng tơrŭm pơla mâu khu rơxông tung pơlê pơla ƀă ngin hnê pơtho ăm pơlê pơla túa ki koai phim, xup um tiô túa Photo Voice mê cho ing tơná kuăn pơlê vâ mơhno tối dêi tuăn i hiâm, túa pêi pro dêi tơná, ing tơná kuăn pơlê hơ’muăn tối mâu khôi túa, vêa vong ki lĕm tro dêi tơná. Luâ tâ mâu ki ê, ing tơná kuăn pơlê hdroâng Rơđế kô chiâng hơ’muăn tối mâu tơdroăng tơná ki lĕm tro má môi, ki ai păng ‘nâng má môi, hơniâp ro má môi, ki tơtro khât má môi, xuân môi tiah tơdroăng châ hlê plĕng vâ pơtối rak vế dêi khôi túa, vêa vong hdroâng kuăn ngo tơná, pơtối chôu ‘măn, rak vế, túa lĕm tro dêi pơlê pơla tơná”.

Ôh ta xê to thăm mơdêk hlê plĕng nhên ‘na hnoăng rak vế ƀă pơtối mơdêk ki kơnía dêi túa lĕm tro tơmeăm khoăng, mơđah tôu chêng koăng Tây Nguyên – tơmeăm khoăng túa lĕm tro dêi hdroâng mơngế, tơdroăng ki tơdjêp pơla tơmeăm khoăng tung kơvâ ôm hyô ối veăng gum mơjiâng chiâng ivá krá kâk ăm túa lĕm tro ‘na mơđah tôu chêng koăng tung chal rêh ối, cheăng kâ nếo nôkố. Xo ing ki tơ’lêi hlâu ‘na kŏng ngê̆ ƀă mâu facebook, zalo, rêm ngế xuân chiâng vâ tơkŭm, tơdjêp ƀă mơjiâng chiâng mâu tơmeăm khoăng ki cho khât păng ‘nâng ‘na tơdroăng rêh kâ ối dêi pơlê pơla tơná, ing mê, veăng gum pêi pro lĕm tro tâ nếo tung rak vế khôi túa, vêa vong lĕm tro dêi rêm kuăn ngo.