Hiăng chiâng tiah hmâ, rêm kơxo má xông koi, tơdroăng apoăng dêi pôa Kơ Să Ha Nhiếu (a cheăm Phú Hội, tơring Đức Trọng, kong pơlê Lâm Đồng) cho vê tăng hyôh vâ tơmâng Todroăng tơpui ƀă nâl K’Ho dêi Rơ’jíu Việt Nam, xua Kơ koan teăng mâ kơpong Tây Nguyên rah chêh. Pôa tối: Lối 20 hơnăm hiăng hluâ, tơdroăng tơpui nâl K’Ho dêi Rơ’jíu Việt Nam hiăng chiâng ngế pú hmâ achê.

Rêm rơkong pơchuât dêi mâu ngế rah chêh hiăng tiah hmâ. Xua mê, pôa pâ nhên rêm tơdroăng ƀă chôu mơ’no rêm hâi ƀă tung măng tĭng. Tung mê, pôa hâk hêng vâ hmâng má môi cho mâu tơdroăng hơdruê, rơngêi, ting ting, hnê pêi kâ, hnê droh rơtăm kơhnâ pêi kâ.

“Á hlo mâu tơdroăng mơ’no tung Rơ’jíu ro ‘nâng. Hmâ hnê kuăn pơlê pêi kâ, hơdruê, rơngêi, ting ting, hơdruê tòng bơr môi tiah ngê̆ nhân Ka Ding. Ai hên tơdroăng hơdruê, rơngêi, ting ting pơchân kuăn pơlê mơ-eăm pêi kâ, thế rak vế cheăng tĕn pong, chêa. Á hâk vâ mâu tơdroăng kố châ thăm mơ’no hên tung rơ’jíu vâ kuăn pơlê châ tơmâng ƀă ing mê kum mơdêk ki rơkê plĕng”.

Ƀă jâ Cil Bri, Kăn phŏ hnê ngăn Khu pơkuâ vâi kơdrâi kong pơlê Lâm Đồng, Tơdroăng tơpui nâl K’Ho dêi Rơ’jíu Việt Nam cho ƀâng ki xiâm dêi Tơnêi têa. Ôh tá xê to tối mâu tơdroăng nếo ai tung tơnêi têa ƀă lâp plâi tơnêi, mê tối tơdroăng nếo ai tung kơpong Tây Nguyên tối tơdjuôm ƀă Lâm Đồng tối krê.

Tiô jâ Cil Bri, mâu tơdroăng xiâm châ tơpui ƀă nâl ƀă chư chêh dêi mơngế K’Ho tung ƀâng rơ’jíu xuân môi tiah trang Web VOV4.K’Ho dêi VOV Tây Nguyên, hiăng kum kuăn pơlê châ trâm mâu ngế rơkê ƀă teăm tơdrêng.

“Á hâk vâ tơmâng tơdroăng tơpui nâl K’Ho dêi Rơ’jíu Việt Nam kơpong Tây Nguyên. Xua a kố ai hên tơdroăng tối ‘na khôi túa lĕm tro, kal kí, cheăng kâ – pơlê pơla, gâk kring ƀă rak vế khôi túa lĕm tro, hnê mơhno vâi kơdrâi ai kuăn preăng, kuăn iâ, xuân môi tiah troăng rak ngăn păn kuăn, pêi kâ, rak ngăn tung hriâm tâp, hnê mơhno pâk pơkeăng vaccine tŭm, á hlo tơdroăng mê pơxúa ƀă tơdroăng pêi cheăng dêi á...’’.

Ƀă nghê̆ nhân ưu tú K’Brèm, nôkố dế pêi cheăng a Tíu xiâm khôi túa lĕm tro, tơdroăng kal ƀă Tơ’noăng ivá tơring Bảo Lâm, kong pơlê Lâm Đồng, Tơdroăng tơpui nâl K’Ho dêi Rơ’jíu Việt Nam tơ’nôm khôi túa lĕm tro vâi krâ nah dêi hdroâng kuăn ngo ngin. Xua ing mâu tơdroăng ‘’Hơdruê, rơngêi, ting ting Tây Nguyên’’, “Hơdruê pái kơpong’’, “Tíu pơtroh hơdruê, rơngêi, ting ting” dêi Rơ’jíu Việt Nam, nghê̆ nhân ưu tú K’Brèm kô ai tơ’nôm tơmeăm vâ kum tung tơdroăng pêi cheăng ‘na khôi túa lĕm tro a kong pơlê.

Klăng roh leh tơbâ 22 hơnăm mơ’no a ƀâng hdroâng kuăn ngo Tơdroăng tơpui nâl K’Ho dêi Rơ’jíu Việt Nam, ngê̆ nhân ưu tú K’Brèm, pơtroh rơkong rơkâu tá hiâm mơno:

“Klăng leh tơbâ 22 hơnăm, á pâ Rơ’jíu pin drêng lâi xuân mo châ, thăm troh a pơlê vâ ti tăng chêh mâu khôi túa lĕm tro vâi krâ nah tơdroăng ki lĕm jâ pôa nôu pâ, jâ pôa pin nah. Ôh tá krê to mâu tơdroăng hơdruê môi tiah đơs ting đơs loong, hơdruê tam pơ̆t, kồng yai dêi mơngế K’Ho – Mạ, á pói vâ tâi tâng kuăn pơlê rơtế dêi pó rak tơdroăng ki lĕm tro kơnía dêi jâ pôa pin nah’’.

Hiăng châ 22 hơnăm tơpui tung rơ’jíu, mâu ngế tơplôu tơbleăng tơpui pơchuât nâl K’Ho dêi Rơ’jíu Việt Nam tâ rơrêk hên tung hiâm mơno. Tâi tâng mâu ngế rah chêh, tơplôu, tơpui pơchuât pơrá lo ing mâu pơlê dêi kong pơlê Lâm Đồng, troh ƀă Kơ koan teăng mâ Rơ’jíu Việt Nam kơpong Tây Nguyên (tíu pêi cheăng a pơlê kong kơdrâm Ƀuôn Ma Thuột, Dak Lak) vâ pêi pro hnoăng cheăng ki kân kố.

Lối 20 hơnăm pêi cheăng, mâu ngế rah chêh ôh tá xê to tơplôu, pơchuât ƀă rơkong tơpui dêi nôu ki rơneh dêi tơná tung ƀâng rơ’jíu, mê ối ai mâu roh pêi cheăng a mâu pơlê kơpong hơngế hơngo, trâm mâ kuăn pơlê tơmâng rơ’jíu, thâu hrik tơdroăng hơdruê, rơngêi, ting ing ƀă chêh ƀai, tơpui tơno djâ tơdroăng rêh ối.

Ngoh K’Brop, Kăn phŏ pơkuâ Ƀơrô rơkong tơpui hdroâng kuăn ngo, Kơ koan teăng mâ kơpong Tây Nguyên (Kăn pơkuâ khu tơpui nâl K’Ho) tối:

“Lối 22 hơnăm rơtế ƀă Tơdroăng tơpui nâl K’Ho, 7 hơnăm cho Kăn phŏ pơkuâ Ƀơrô rơkong tơpui hdroâng kuăn ngo, mơhé pôu râng hnoăng ki lâi, á xuân mơ-eăm pêi kêi đeăng lĕm hnoăng cheăng châ pơcháu. Klăng roh leh tơbâ 22 hơnăm Hâi tơpui tung rơ’jíu a poăng nâl K’Ho, á pâ rơkâu tâi tâng nhŏng o rah chêh, tơplôu, tơpui nâl K’Ho ivá mo sêi, krá tơniăn ‘na kal kí, trâu hơngế ‘na tơdroăng cheăng, pơtối cho kông tơdjêp pơtâng tối troăng hơlâ dêi Đảng ƀă Tơnêi têa troh vâi krâ kuăn pơlê mơngế K’Ho ƀă nâl hdroâng kuăn ngo tơná, veăng kum rak khôi túa lĕm tro dêi mơngế K’Ho ing tơdroăng tơpui tung rơ’jíu ƀă trang Web tung Internet, vâ tơdroăng tơpui nâl K’Ho đi đo cho tơdroăng ki pơxuá ăm tuăn mơno rêm hâi ôh tá păng lôi ƀă achê dêi kuăn pơlê mơngế K’Ho’’.

22 hơnăm hiăng hluâ, tơdroăng tơpui nâl K’Ho rơtế ƀă 5 tơdroăng tơpui hdroâng kuăn ngo ki ê a kơpong Tây Nguyên, mê cho: Rơđế, Jarai, Bơhnéa, Rơteăng ƀă M’Nông đi đo rak hiâm mơno rŭm môi tuăn, rơtế dêi pó pêi pro lĕm tro pơtâng tối troăng pơkâ pêi, troăng hơlâ dêi Đảng ƀă Tơnêi têa troh kuăn pơlê mâu hdroâng kuăn ngo. Tơdroăng tơpui nâl K’Ho đi đo cho ngế pú hmâ achê dêi pơlê pơla Tây Nguyên.