Pơlê pơla dêi hdroâng mơngế Bơhnéa hmâ ai tơdroăng ki tơrŭm, mơhno tối tơdroăng ki tơrŭm môi tuăn tung rêh ối pơlê pơla, maluâ mê cho tơdroăng cheăng tơdjuôm dêi pơlê lơ tơdroăng krê dêi rơpŏng hngêi tơná, rêm ngế đi đo vâ môi tuăn tŏng kum dêi pó. Pơtih, tung tơdroăng pêi chiâk pêi deăng, vâi krâ-nhŏng o hmâ tơkŭm pêi cheăng vâ pêi drôm dêi pó vâ kum dêi pó pêi cheăng rĕng tâ, châ tơƀrê tâ. ƀă ai drêng la lâi pêi cheăng tơdjuôm tiah mê, tâng lơ tro po chêng vâi ê, kŏng vâi ê, pro ăm ngế ki mê châi lo mơheăm ƀă hên mâu tơdroăng ki ê, tơdroăng ki apoăng ngế ki tro po chêng, kŏng vâi mê athế po tơdroăng ki tơkêa ôh tá pro xếo tơdroăng ki tro xôi, cho Tơmăr.

Pôa Rưm, 49 hơnăm a pơlê Kơtu, cheăm kơpong hơngế Kông Chêng, tơring ‘Mang Yang, kong pơlê Gia Lai tối ăm ‘nâi, khôi túa Tơmăr mê mơngế Bơhnéa ngăn cho túa ki vâ hngâ păng ‘nâng ing hiâm mơno, mơohno tối tơdroăng pói  rơhêng vâ dêi ngế ki ôh tá mơhúa tro pro mâu tơdroăng ki ôh tá lĕm tro, vâ pro ti lâi ăm ngế ki tro po chêng, kŏng rong mê rĕng mo lĕm ivá, ôh tá khéa  hơ’nêng, ôh tá hêng hôu, ôh tá ai tơdroăng tăm nâ, kơneăm dêi pó ton:

“Khôi túa Tơmăr mê cho túa ki lăm pâ vâi mâ tá ‘nhó dêi pó, pâ phep ngế ki tơná tro xôi ƀă vâi mê rĕng mo lĕm châ, tơniăn, ôh tá châi tamo klâi ôh. Pơtih, drêng pêi chiâk pêi deăng tơdjuôm, pin ôh tá mơhnŏng tro po chêng, kŏng vâi, la tâng ôh tá mơhúa tro pro vâi lo mơheăm chhá, mê tung hiâm mơno pói  rơhêng vâ pâ vâi mâ tá ‘nhó dêi tơdroăng ki tơná hiăng pro mê, xua mê khoh chiâng ai tối Tơmăr.

Ki xiâm dêi tơdroăng mê cho vâ mơhno tối hiâm mơno hơ-ui pâ kơ ngế ki tro châi mê, xua tơná pin tro pro vâi chiâng rong, pin pói rơhêng vâ vâi ôh tá tro châi tamo ƀă ôh tá ai tơdroăng ki tăm nâ dêi tơná”.

 Tiô pôa Lick, Krâ pơlê, hiăngu 66 hơnăm, ôí a pơlê Piơm, pơlê kân Đăk Đoa, kong pơlê Gia Lai, hdrối nah, mơngế Bơhnéa ngăn nhoăm khât khôi túa ki kố, cho Tơmăr, xua ga kum ăm pơlê cheăm tơrŭm dêi pó, hơniâp ro dêi pó. Khôi túa kố, ôh tá xê thế eâ ai tơmeăm ki kơnâ, la pơkal athế ai vâ mơhno tối tơdroăng ki hngâ ƀă hiâm tuăn mơno.

Tơmeăm ki vâ pro Tơmăr mê ngăn tiô kơ tơdroăng ki tro pro vâi châi iâ lơ ó. Tâng ngế tro rong xua pin pro vâi, chiâng ai hbáu, lo mơheăm mê athế ai môi to drôu xiâm ƀă í. Tâng bú tro tơlêa iâ tê mê athế pâ mâ tá ‘nhó ƀă rơkong tơpui lơ môi tơdrong hât, to lâi pŭm kơtâ í ƀă mâu tơmeăm ki ê. Khôi túa Tơmăr xuâ ối cho vâ mơdât tơdroăng ki tơpôu xôi, tơdroăng tí tăng mơnĕn dêi pó hmâng lơ vâ, lơ pơxâu phak vâi ki ê ôh tá tro tơdroăng.

Ai mâu ‘nâ tối ăm ‘nâi, tơná tro châi tamo. tro tơngê ton cho xua ngế ki kố, ngế ki tá pro. Xua ti mê, tâng ôh tá pro Tơmăr mê kô chiâng ai mâu tơdroăng ki kơneăm, tăm nâ, pro chiâng ai tơklâ dêi pó tung pơlê pơla.

Pôa Lick-Krâ pơlê tối tơ’nôm:

“Tâng ôh tá pro Tơmăr mê tơdroăng ki ôh tá xê mơhnŏng la tro pro vâi ki ê tro rong, tro châi, la tơdroăng mê tá hâi teăm châ tơleăng mơnhên, ƀă la ngiâ ah, tâng lơ chiâng ai tơdroăng châi tamo ngế ki mê kô chiâng pro ăm mơngế ki tro rong mê athế pôu râng dêi tơdroăng tơná tro pro. Klêi kơ’nâi hiăng pro Tơmăr mê a la ngiâ ah, tâng ai tơdroăng châi tamo ki kố ki mê, ga kô ôh tá ai tơdjâk ki klâi troh mâu ngế ki ê nếo”.

Ƀă mơngế Bơhnéa, khôi túa Tơmăr ti xê to cho vâ hngâ ƀă tuăn mơno lơ mơdât to tơdroăng ki tí tăng tơpôu xôi kơ vâi hmâng lơ vâ, lơ pơxâu kơ vâi hmâng to lo vâ, mê ga ối cho tơdroăng ki vâ hnê mơhno ăm rêm ngế ‘nâi ‘na túa ki tơpui kâ tung pơlê pơla. Ki má lối, cho vâ tối pơchân, hnê ăm rêm ngế ôh tá khoh pro ‘mêi troh ivá ăm kơ mâu vâi ki ê.

Pôa Suck, môi ngế ki hlê plĕng ‘na khôi túa vâi krâ nah dêi mơngế Bơhnéa, dế nôkố rêh ối a pơlê kân Đăk Đoa, kong pơlê Gia Lai tối tiah kố: Tâng pin lơ tro pro mâu tơdroăng ki pin ôh tá mơhnŏng, môi tiah tơdroăng tro pro rong ăm vâi ki ê, pro rong châ chăn vâi ki ê mê pin athế ‘nâi pâ phep vâi mâ ta ‘nhó vâ pin sĭng hmréa, ai tơdroăng tơrŭm tung pơlê pơla.

“Ki tơ’ló dêi khôi túa kố cho vâ mơhno tối ăm rêm ngế drêng tro pro xôi ki kố ki mê, tâng lơ pro vâi tro rong, tro châi, chiâng hbáu mê athế ‘nâi, pâ phep, pâ mâ tá hngâ vâ pôi tá ai tơdroăng ki ôh tá pro ‘mêi tuăn hiâm dêi pó. Pơtih tâng lơ ai khu vâi hdrêng drêng vâi xah hêi dêi pó, vâi nŭm tro dêi pó, kuăn ‘nĕng vâi tro châi tamo mê vâi kô pro Hâi Tơmăr.

Khôi túa kố ti xê to pơkâ pro ƀă tơdroăng ki tro xiăn pâm vâi, tro po vâi ƀă ‘nêk chiâng hbáu, mê ga ối cho hnê mơhno vâi ai tơdroăng rêh kâ ối, túa tơpui kâ i lĕm dêi pó...”.

Nôkố, tơdroăng rêh ối hiăng châ mơdêk, rơkê plĕng, hloh hlê, mê khôi túa, vêa vong Tơmăr dêi hdroâng Bơhnéa kal athế châ rak vế. Xua mê, cho khôi túa ki lĕm tro tung mơhno túa lĕm tro tung pơlê pơla. Mơngế Bơhnéa a Gia Lai xuân ối rak vế dêi khôi hmâ ki kố vâ hnê mơhno tối ăm kuăn muăn, cháu chái athế hơ-ui pâ dêi pó, tŏng veăng dêi pó, ‘nâi hngâ, ‘nâi pâ phêp mâ tá ‘nhó ƀă pôu râng dêi hnoăng cheăng drêng ai tro pro xôi, pro tơdjâk ‘mêi troh ivá châ chăn dêi pó, lơ mơngế ki ê.