Kerry cho môi ngế vâi droh Bơhnéa Rơngao mơhum mâ ƀă xông kân tung môi rơpŏng hiăng ai 4 rơxông rơkê cheăng tĕn hmôu jiâ. Sap ing ối kŭn nah, nâ hiăng châ dêi nôu ƀă jâ hnê tơdroăng cheăng tĕn hmôu jiâ-môi tơdroăng cheăng ki vâi kơdrâi Bơhnéa ngăn mê cho tơdroăng ki hâk tơngăm dêi hdroâng kuăn ngo tơná. Mâu hmôu jiâ ki apoăng ing kơpeăng kŏng dêi nâ teăn ki apoăng bu cho mâu kơpâu, hmôu, jiâ ki vâ xúa tung rơpŏng hngêi tê. Laga, ƀă tơdroăng ki rơkê plĕng ƀă hlê nhên, ngế droh mê ‘nâi hmôu jiâ dêi Bơhnéa xuân chiâng vâ tĕn pro chiâng tơmeăm khoăng ki ê, tâng ‘nâi tơrŭm tung tơdroăng ki rak vế ki rơneăm túa vâi krâ nah, la pơchoh chiâng mâu ếo pơtâk ki xâp rơnuâ tiô chal nếo. Nâ Kerry ai tối tiah kố:

“Tâng vâ tối ‘na cheăng tĕn hmôu jiâ mê á pơxiâm tí tăng ngăn, mơhriâm ing á dế ối tơxĭn nah, drêng dâng 8 hơnăm, á hriâm tiô dêi nôu, tiô jâ ing mê, á hiăng chiâng vâ teăn, laga, Kerry lăm hriâm đăi hok a Pơlê kong kân Hồ Chí Minh, kơ’nâi mê, Kerry prếo vêh akố vâ pơtối rak vế dêi khôi túa, vêa vong hdroâng kuăn ngo tiô dêi nôu, jâ hiăng hnê ‘măn ăm nah, Kerry rơhêng vâ pơtối châ mơdêk khôi túa lĕm tro dêi hdroâng kuăn ngo tơná”.

Mơgêi xo ƀâng Hngêi trung Đăi hok Văn hoă Ngê̆ thuât la ƀă tơdroăng ki hâk git khât kơ tơdroăng ki teăn hmôu jiâ, pơchoh chêp ếo pơtâk, mê ngế droh ki mê hiăng kơhnâ hriăn plĕng, tí tăng mơjiâng mâu tơmeăm khoăng ki ê, pakĭng tơdroăng pơchoh chêp ếo, lơ hmôu jiâ, bung, duh. Nâ hiăng tí tăng teăn pro hên mâu tơmeăm khoăng ki nếo, ing kơtong yĭng, kơtong tâ liăn, môk ta troh a mâu ếo chal nếo, ếo vest, ếo xŏn, pơtâk xŏn ƀă hên mâu tơmeăm khoăng ki ê vâ xah ôm hêi a mâu hâi pơkoăng ŏng mế, hâi ôu kâ kân pơlê pơla. Rêm tơmeăm ki mê cho môi tơdroăng ki tơrŭm mơjiâng pro hên túa, vêa vong lĕm tro tiô chal krâ nah ƀă ai tá tơdroăng ki tơrŭm mơjiâng pro ƀă túa lĕm ro chal nếo nôkố.

Ngoh Nguyễn Mạnh Hùng, môi ngế ki chêh kơchuâ pá kong a pơlê kong kơdrâm Plei Ku, kong pơlê Gia Lai tối ăm ‘nâi, mâu tơmeăm ki Kerry mê ôh tá xê to tơdroăng ki tơrŭm cheăng pơla tơmeăm khoăng tiô túa vâi krâ nah ƀă chal nếo mê ối cho tơmeăm khoăng ki dâi lĕm khât, lĕm ro, mơjiâng chiâng tơmeăm ki tơ’lêi hlâu ăm mơngế ki sâp rơnuâ.

“Á xuân cho môi ngế ki tĕn hmôu jiâ, chêo pơchoh hmân ếo, ki rơhêng vâ tối á châ hlê plĕng nhên, xuân cho tơmeăm ki tĕn ing khôi túa pin hiăng hnê djâ mê kal athế ai tơdroăng ki pơhlêh phá tơ-ê iâ, tơdjêp troh tơdroăng chal nếo ƀă khôi túa, vêa vong chal vâi krâ roh nah. Drêng mơnuá pê ngăn a mâu tơmeăm ki pin tĕn, pơchoh, chêp ƀă kŏng kố, maluâ pá kong ga hơ’nhon hơ’nhăn, la drêng pin xâp ah, mê nếo tâ ki rơmuăn ƀă ki rơngiâp lĕm”.

Ngoh Trần Tuấn Hùng, môi ngế ki lo ing Pơlê kong kân Hồ Chí Minh ai tối tiah kố:

“Hâi kố, á mơhúa châ troh ngăn tơmeăm, hmân ếo, hmôu jiâ dêi Kerry. Roh apoăng á xâp tâ hơtôu ‘nâng, á hâk vâ ‘nâng, mâu tơmeăm ki teăn rơneăm a mâu tơmeăm hmôu jiâ, ếo pơtâk mê cho lĕm ro păng ‘nâng, rơhí rơhó ƀă pêi pro krâu khât. Drêng á xâp mâu ếo ki mê tâ dêi tơná môi tiah hiăng mot tung khôi túa, vêa vong dêi hdroâng Bơhnéa a tíu kố, thăm rế hâk mơjo pâ, tơdroăng ki tơrŭm pơla nhŏng o Xuăn ƀă Bơhnéa”.

Tơkâ luâ mâu tơdroăng pá puât ‘na tuăn tơmiât, hriăn plĕng mâu um rơneăm ăm ga i tơtro tiô kơ tơdroăng pói rơhêng vâ dêi hngêi kơchơ chal nếo nôkố, la xuân ối rak vế tuá lĕm tro dêi hmôu jiâ hdroâng Bơhnéa, mâu tơmeăm ki tĕn mê xuân ối cho tơmeăm khoăng ki pêt mơjiâng, lơ chiâng xêh tung kong, troh a tơdroăng lăm djâ tê a hngêi kơchơ, a mâu hngêi mơdró, tíu mơdró dêi nâ hiăng châ po rơdâ hên tung mâu kong pơlê, pơlê kong kân tung tơnêi têa ƀă kong têa ê. Troh nôkố, Kerry hiăng ai 2 tíu ki pêi cheăng xiâm cho a pơlê kong kơdrâm Kon Tum, kong pơlê Kon Tum ƀă a pơlê kong kơdrâm Đà Lạt, kong pơlê Lâm Đồng. Nâ Kerry tối tiah kố:

“Mâu hmôu jiâ ki Kerry kố hiăng châ tê mơ’no hên troh a mâu kong têa, môi tiah: Sinuâ, Hàn Quốc, Mih Alơmăng, Swiss, Malaysia ƀă hên heĕng mâu kong têa ki ê. Kerry pói rơhêng vâ pơtối mơdêk khôi túa lĕm tro dêi hdroâng kuăn ngo tơná, ôh ta xê to tung tơnêi têa, a kơpong tơnêi dêi tơná mê ối châ mơ’no tê troh hên mâu kong têa ki ê tung lâp plâi tơnêi”.

Kerry ôh ta xê to môi ngế ki rơkê hơnăm ối nếo hâk git ƀă tơdroăng cheăng teăn hmôu jiâ, mê ối cho ngế ki hnê mơhno tối ăm hên mâu pú hmâ hơnăm ối nếo tung pơlê pơla, cheăm bêng. Tơdroăng ki hơ’muăn tối dêi nâ cho vâ mơnhên ki lĕm ro ăm tơdroăng ki mơjo pâ ƀă hnoăng cheăng teăn hmôu jiâ ƀă tơdroăng ki hloh hlê rơkê plĕng. Mâu tơmeăm môi tiah hmôu jiâ mê dêi Kerry ôh tá xê to pơtối rak vế, khôi túa, vêa vong mê ối cho roh ki tơ’lêi hlâu nếo ăm vâi kơdrâi Bơhnéa, tơdrêng amê, vêh mơnhên tơdroăng ki hloh rơkê, kơhnâ mơ-eăm ƀă tuăn mơno hâk tơngăm dêi hdroâng kuăn ngo ing mâu hmôu, jiâ, rêm tơmeăm khoăng ki  teăn mơjiâng mê.