Khu ngế rơkê dêi Hô̆i đong pơkuâ Kiâp hmốu lâp plâi tơnêi UNESCO tơkŭm vêh mơnhên Kiâp hmốu lâp plâi tơnêi UNESCO Dak Nông vâ kum tơmeăm khoăng tung kơdrum kiâp hmốu lâp plâi tơnêi mơnhông krá tơniăn. Khu râ kăn kô tơkŭm mơnhên tơmeăm a Kiâp hmốu lâp plâi tơnêi UNESCO Dak Nông sap ing kố troh hâi lơ 30/6 la ngiâ.

Klêi kơ’nâi lăm ngăn nhên, khu ngế rơkê kô hôp ƀă Vi ƀan kong pơlê Dak Nông. Tung tơdroăng vêh mơnhên mâu tíu troh ối tung Kơdrum reăng kiâp hmốu lâp plâi tơnêi UNESCO Dak Nông, khu ngế rơkê kô ti tăng mơ-éa chêh, châ hlo châ tâ hên tơdroăng.

Ing mê, mâu ngế rơkê veăng tơpui tối, pơkâ thế vâ kum mơnhông mơdêk tâ Kơdrum reăng kiâp hmốu lâp plâi tơnêi UNESCO Dak Nông. Châ tơƀrê dêi roh vêh mơnhên Kiâp hmốu lâp plâi tơnêi UNESCO Dak Nông kô châ Hô̆i đong pơkuâ Kơdrum kiâp hmốu lâp plâi tơnêi tơpui tơno ƀă têk kŏng môi tuăn a khế 11/2023.