Pó vâi krâ-nhŏng o nếo klêi hmâng rơkong pôa Y Nguk Niê hơdruê eirei. Tơdroăng hơdruê kố cho koh pơ-eăng pơlê pơla lĕm ro, pro ngế ki hmâng thăm ai hiâm tuăn hơniâp ro, loi tơngah tơdroăng rêh ối, pơchân tối ‘na tơdroăng loi nhoăm, rak vế ‘na mâu hdrê loăng kong, kơno têa dêi pơlê.

Pakĭng mâu tơdroăng rơngê ting ting koh pơ-eăng ‘na pơlê cheăm, tơnêi têa, mê pôa Y Nguk Niê ối chiâng hơdruê hên mâu ƀai rơngê, ting ting ki êng tiâ dêi pó ‘na tơdroăng pro tơhmâ pơla khu vâi droh rơtăm, tơdroăng tối pơchân dêi kuăn cháu kơhnâ khât tung hriâm tâp vâ la ngiâ ah veăng kum mơjiâng pơlê cheăm kro mơdrŏng tâ.

Pôa Y Nguk Niê kot mâ ƀă xông kân tung môi rơpŏng ai nôu pâ, jâ nôa pơrá cho mâu ngế ki rơkê rơngê ting ting. Sap ing ối tơxĭn nah, idrâp rơngê, ting ting ai drêng chôa ‘lâng, drêng rơdêi, hơniâp ro dêi mâu tơdrá hơdruê Rơđế hiăng mot tung hiâm tuăn pôa. Rêm hdroh tiô dêi nôu pâ lăm a chiâk a deăng, cho mâu roh ki châ hmâng dêi pâ hlŭm rơvŏng, hlŭm đing buôt lơ đing năm rơtế ƀă idrâp ki rơngê, ting ting, vâ tah lôi tơdroăng ki tô téa kơhâi dế, pêi cheăng tơbrê tơbrêh.

Pôa Y Nguk Niê ai tối tiah kố, mâu tơdroăng rơngê, ting ting cho ki xiâm vâ mơhnhôk, hnê pơchân ăm dêi châ tơná, ƀă kuăn ‘nĕng cháu chái tung rơpŏng hngêi, xua ing idrâp rơngê, ting ting mê pơtroh tơdroăng ki hơniâp ro ăm dêi tơná, ăm mơngế tung rơpŏng hngêi, ƀă ing mê, xuân cho ki xiâm vâ hnê mơhno tối, pơchân kuăn ‘nĕng, cháu cháu rak vế, pêi pro tro tiô Đảng, luât tơnêi têa hiăng hnê djâ.

“Á hmâ hơdruê eirei, ‘nâi tŏn chêng. Rêm hdroh rơngê, ting ting dêi Rơđế ngin á tâ hơniâp ro. Tơdroăng rơngê ting ting Rơđế ga ai hên, cho tơdrá kưt, eirei. Mê cho mâu tơdrá ki hmâ koh mơnê Đảng, Tơnêi têa, ôh tá tơmâng tiô khu ‘mêi djâ pro tơ’nhê pơlê cheăm, pơchân tối kuăn cháu kơhnâ pêi chiâk deăng, mơhriâm rơkê”.

Ti xê to chiâng hơdruê hên tơdroăng, mê pôa Y Nguk ối ‘nâi hlŭm đing năm, cho ngế ki kơhnâ rơkê má môi dêi khu tŏn chêng koăng cheăm Čư̆ Mgar, tơring Čư̆ Mgar. Ƀă tơdroăng ki hâk mơnâ git khât châ hnê tối tơdroăng rơngê, ting ting ăm rơxông kơ’nâi, pôa Y Nguk Niê rơtế ƀă mâu vâi krâ tung pơlê đi đo kơhnâ khât tung tơdroăng ki veăng hnê tối ‘na rơngê, ting ting, mơđah a pơlê cheăm. Pôa Y Nguk Niê tối ăm ‘nâi tơ’nôm:

Um 2: Pôa Y Nguk Niê hlŭm đing năm a kơbong thâu rơngê ting ting VOV Tây Nguyên

“Ngin cho mâu ngế ki hiăng krâ, hơnăm hiăng hên xuân hiăng tơmiât hên troh tơdroăng la ngiâ. Hên mâu ngế ki hên hơnăm hiăng vêh dêi ƀă jâ pôa. Ngin cho mâu ngế ki prôk ahdrối pơrá rơhêng vâ hnê mơhno ăm rơxông kuăn cháu. Hơdruê eirei lơ hơdruê kưt, tŏn chêng lơ mâu prôa, rơvŏng ki ê. Maluâ tung tơdroăng ki mơđah dêi pơlê cheăm, lơ ‘mế kiâ, ngin pơrá ai mâ”.

Tô tuăn ‘na khôi túa, vêa vong dêi hdroâng kuăn ngo tơná lơ hía lôi, ƀă hnoăng cheăng cho kăn ƀuôn Huk B hiăng lối 25 hơnăm kố, pôa Y Nguk Niê đi đo hnê tối ăm nhŏng o ‘nâi hâk git dêi khôi túa, vêa vong dêi hdroâng kuăn ngo tơná ing mâu roh hôp pơlê. La vâ chiâng pêi pro mâu tơdroăng ki kố, mê ing tơá kuăn pơlê athế veăng rak vế, pêi pro, rơtế rak vế chêng koăng, tơdrá kưt, eirei vâ ga châ pơtối chhâk hơngế tung la ngiâ. Pôa Y Nguk Niê ăm ‘nâi tơ’nôm:

“Dế nốkố, tơnêi têa tŏng kum vâi krâ-nhŏng o pin athế ‘nâi rak vế dêi  chêng koăng, rơngê ting ting, rak vế nâl tơpui dêi kuăn ngo tơná. Tơdroăng mê cho vâ mơhno tối, tơnêi têa tŏng kum, ngăn khât kơ kuăn pơlê pin. Ôh tá piu mâu khôi túa, vêa vong dêi hdroâng kuăn ngo Rơđế. Pin athế hnê tối ăm kuăn ‘nĕng, cháu chái, ki rơhêng vâ tối ƀă mâu vâi hdrêng ki ai sap ing 7 troh 8 hơnăm, mê pin vâi krâ athế ai hnoăng hnê tối, khĕn pơchân ăm kơ vâi hdrêng vâ vâi i pâ vế, klê plĕng”.

Pêi hnoăng cheăng ki ôh tá ai kơbố ‘nâi, ing hiâm tuăn ki hâk git, pôu râng hnoăng cheăng, pôa Y Nguk Niê a ƀuôn Huk Ƀ, cheăm Čư̆ Mgar, tơring Čư̆ Mgar, kong pơlê Dak Lak dế rêm hâi kum ăm vâi krâ-nhŏng o ‘nâi mơjo dêi mâu tơdrá ki chôa ‘lâng, idrâp rơvŏng đing buôt ki chôa ‘lâng, rơnguâ, idrâp  chêng koăng ki hơniâp ro ƀă hên hĕng mâu prôa ki ê. Kơnôm ai hiâm mơno ki hâk git, mơjo pâ khôi túa lĕm tro dêi hdroâng kuăn ngo tơná môi tiah Y Nguk Niê mê hiăng veăng kum rak vế, pro mơhno tơdroăng ki bâ eăng, ki ai pơxúa kân khât dêi khôi túa, vêa vong dêi hdroâng kuăn ngo tơná.