A chê pơla kố, hên kuăn pơlê a Dak Lak dế ko tah dêi kơphế, tiu vâ pêt loăng plâi sầu riêng pêt hên. Kơvâ ngăn ‘na chiâk deăng Dak Lak hnê tối ăm kuăn pơlê pôi tá pêt hên, pôi tá po rơdâ tơnêi pêt sầu riêng vâ ví ki lŭp ‘na kơchơ tê mơdró.  Plâi sầu riêng dế cho môi tung mâu hdrê loăng pêt ki pro pơxúa, châ liăn hên ăm mơngế ki pêt  a Dak Lak.

Lâp tung kong pơlê ai dâng 15.000 ha ƀă kơxô̆ ki mê dế tâk hên. Tâng riân plâi ki châ xo hơnăm 2022 dâng 170 .000 tâ̆n ƀă troh hơnăm 2025 lối 300.000 tâ̆n. Kơvâ ngăn ‘na chiâk deăng hnê tối kuăn pơlê pôi tá kơtâu tiô yă ah po rơdâ deăng pêt tung pơla kố. Drêng kuăn pơlê po rơdâ deăng pêt sầu riêng ƀă vâ tối ôh tá rơtế ƀă tơ droăng krí ‘măn pro, tê, mê kô tơ ‘lêi trâm tơdroăng plâi hên la ôh tá ai ngế rôe.