17.500 hdrê ká tŭm túa; trôi, trắm, mè, mơdâu, ká ilá hiăng châ kăn teăng mâ Khu ngăn tơdroăng ki ká xi xŏng ƀă kuăn pơlê ki păn kơ’nêi a long Vụ Bổn vâ bro tơ’nôm ai mâu hdrê ká, hdrê xi xŏng a cheăm dế mơni kô ôh tá ai xếo.

Kố xuân cho tơdroăng cheăng ki châ pơtối rak vế rêm hơnăm vâ ‘mot tơ’nôm ai ká xi xŏng a cheăm tung lâp kong pơlê, veăng kum ‘mâi păn roăng ká xi xŏng, ai hên mâu hdrê ká xi xŏng tung mâu kơpong ki ai têa chiâng xêh a kong pơlê Dak Lak. Hơnăm kố, Khu ngăn tơdroăng ki păn ká xi xŏng kô tơkŭm po 5 rôh ƀă dâng 100 rơpâu hdrê ká tŭm túa a mâu têa kroăng, long ki kân a 5 tơring mê cho: Krông Pač, Ea H’Leo, Krông Ana, Krông Năng ƀă Lak.