Dak Lak nôkố ai lối 22.500 ha ƀăng tơnêi pêt sầu riêng ƀă plâi sầu riêng krí xo châ lối 200 rơpâu tâ̆n, tung pơla krí sap ing mơ’nui khế 7 troh khế 10 rêm hơnăm. Troh nôkố, sầu riêng Dak Lak dế mot tung rơnó krí. Vâ tơ’lêi hlâu tung tơdroăng ki tê ngi kong têa ê, Khu ngăn chiâk deăng ƀă mơnhông thôn pơlê kong pơlê Dak Lak pơkâ thế Khu xiâm rak vế pơkeăng xôh kơdê oa hdrong pơcháu tíu pêi cheăng ki ối tung Khu xiâm, pơtroh kăn ƀô̆, xing xoăng kế tơmeăm ki xúa ‘na kơvâ cheăng kố tơkŭm po rôh lăm séa ngăn ƀă chêh bro hlá mơ-éa séa ngăn a kong pơlê ƀă mâu lô sầu riêng kong pơlê Dak Lak tung rơnó krí hơnăm 2023.

Hdrối mê, a rôh pêi cheăng pơla Khu xiâm rak vế pơkeăng xôh kơdê oâ hdrong ƀă Khu ngăn chiâk deăng ƀă mơnhông thôn pơlê kong pơlê Dak Lak, Khu pơkuâ ngăn sầu riêng kong pơlê Dak Lak, Khu xiâm rak ngăn pơkeăng xôh kơdê oâ hdrong hiăng môi tuăn pơtroh kăn ƀô̆ ƀă xing xoăng kế tơmeăm xúa tung kơvâ cheăng kố tơkŭm po lăm séa ngăn ƀă bro hlá mơ-éa séa ngăn a kong pơlê ăm mâu lô sầu riêng dêi Dak Lak.