Tung rôh Leh tơbleăng kơphế Ƀuôn Ma Thuột rôh má 8 hơnăm 2023, kơxo lơ 10/3, a pơlê kong kơdrâm Ƀuôn Ma Thuột Khu tơrŭm pơkuâ ngăn kơphế Ƀuôn Ma Thuột tơkŭm po leh pơxiâm po tơ’noăng. Hơ’lâk kơphế lĕm Việt Nam hơnăm 2023. Kố cho môi tung mâu tơdroăng ki xiâm dêi rôh po mơdĭng, veăng kum pêi pro mâu tơdroăng pơkâ ăm Ƀuôn Ma Thuột chiâng tíu troh dêi kơphế lâp plâi tơnêi.

Po sap ing hâi lơ 10 troh 13/3, rôh tơ’noăng kố tơkŭm 33 ngế tơ’noăng lo ing 9 to kong pơlê tung lâp tơnêi têa, tung mê ai 24 ngế ki tơ’noăng chêh inâi ƀă tơdroăng ki pro hơ’lâk tung phin tiô khôi hmâ ƀă 27 ngế chêh inâi tơ’noăng pro hơ’lâk Pour V60 (pro hơ’lâk kơphế ƀă phêuh ƀă hlá mơéa).

Rôh tơ’noăng kố cho vâ châ ‘nâi, ô eăng, mơđah tơbleăng um méa mâu ngế ki rơkê tung hơ’lâk pro kơphế; Mơdêk hnoăng cheăng dêi hơ’lâk pro vâ chiâng ai kơphế ki kơhiâm lĕm tiô tơdroăng ki rơhêng vâ ôu rế hía rế hên dêi mâu ngế ki ôu; Tơbleăng, mơđah, mơnhông kơvâ kơphế ki lĕm Việt Nam, mơhno túa lĕm tro kơphế Việt Nam veăng kum mơdêk ‘na tơdroăng ki ôu tung tơnêi têa ƀă ki kơnía dêi kơvâ kơphế Việt Nam.