Dâng 2 khế kố, tơdroăng pro ăm mah kơxô̆ kơpong pêt plâi sầu riêng tê ngi kong têa ê a kong pơlê Dak Lak trâm pá, ƀă vâ chê 40 khu hô sơ u ối tá hâi tơleăng. Kong pơlê thăm pêi pro mâu troăng tah lôi pá puât vâ mơjiâng tơ’nôm mâu kơpong pêt plâi sầu riêng chiâng vâ tê ngi kong têa ê tiô troăng chính ngăch, teăm rơnó krí plâi sap khế 8 la ngiâ.

Tiô pôa Lê Văn Thành, Kăn pơkuâ Kơ koan xiâm pơkuâ pêt tơmeăm khoăng ƀă rak vế hdrê kơchâi plâi pôm Dak Lak, kô ai dâng 9000 ha sầu riêng a kong pơlê kô mot rơnó krí xo sap ing khế 8 la ngiâ. Tung mê, kong pơlê nếo ăm châ 63 mah kơpong pêt, tâi tâng ƀăng deăng dâng 2.000 ha.

Vâ pêi pro rĕng tơdroăng ăm mah kơxô̆ kơpong pêt, Vi ƀan kong pơlê Dak Lak hiăng pơcháu hnoăng cheăng séa ngăn, mơnhên kơpong pêt ăm mâu ƀơrô pêi chiâk deăng mơnhông mơdêk thôn pơlê râ tơring; pơcháu Kơ koan xiâm pơkuâ pêt tơmeăm khoăng ƀă rak vế hdrê kơchâi plâi pôm kong pơlê tơkŭm hnê mơhno ăm tâi tâng kăn ƀô̆ ki pêi ‘na tơdroăng kố.

Pôa Lê Văn Thành tối ăm ‘nâi, Rơtế ƀă plâi sầu riêng, Dak Lak ai pơkâ pro ăm mah kơxô̆ kơpong pêt ăm tâi tâng mâu tơmeăm khoăng pêi lo ing chiâk deăng ki kơnâ liăn, xua mê, tơdroăng hnê mơhno ‘na mơjiâng pro, xing xoăng mah kơxô̆ kơpong pêt kô châ pêi pro thâ.