Kơxo lơ 10/1, Vi ƀan kong pơlê Dak Lak tơkŭm po hneăng hôp mơgêi rơnó kơphế hơnăm 2021 – 2022, pơkâ pêi rơnó kơphế 2022 – 2023. Tiô tơbleăng a hneăng hôp, rơnó kơphế hơnăm kố nah, kong pơlê Dak Lak châ lối 526 rơpâu tâ̆n, tâk lối 17.800 tâ̆n tâng pơchông ƀă rơnó hơnăm hdrối. Troh nôkố, kơphế Dak Lak hiăng tê ngi 64 kong têa, kơpong tung lâp plâi tơnêi. Tung mê, Nhuk pơtối cho kong têa rôe hên má môi kơphế Dak Lak.

Hơnăm 2022, pêi lo liăn tê ngi kong têa ê kơphế dêi kong pơlê châ lối 810 rơtuh dollars, châ 21% tâng pơchông ƀă lâp tơnêi têa. Rơnó kơphế 2022 – 2023, Dak Lak tiô tối hdrối tê ngi kong têa ê dâng 420 rơpâu tâ̆n kơphế. Troăng tơmiât pêi dêi kong pơlê ôh tá mơdêk ƀăng deăng pêt kơphế mê rak tơniăn a kơlo 204 rơpâu hectar, pêi lo châ dâng 526 rơpâu tâ̆n.