Tung péa hâi, hâi lơ 11 ƀă 12/7 , Hô̆i đong tối, pơxá mâu tơmeăm OCOP kong pơlê Dak Lak tối, pơxá kơlo ối tơmeăm OCOP rôh má 3 dêi hơnăm nah 2022. Tơdroăng “Rêm cheăm môi tơmeăm” rế châ tơmâng khât, tơ’mot hên ngế vâ tơmâng. Rôh tối mê, pơxá ối má to lâi drêng kố, ai 30 tơmeăm dêi khu tơmeăm kế kâ, têa ôu, pơkeăng nhâ loăng dêi 18 ngế khu ki pêi lo cho mâu kŏng ti pêi cheăng tiô rơnó, Khu pêi cheăng tơrŭm , ƀă rơpŏng tê mơdró tung pơlê kong kơdrâm Buôn Ma Thuột, tơring Krông Pač, Krông Năng, Čư̆ Mgar ƀă Krông Ana. Kố xuân cho mâu tơmeăm pê lo ing chiâk ki hên, dêi tơrêm kơpong a mâu  tơring cheăm ki châ pêi lo hên lĕm mơnâ mâ, ‘nâi xiâm rêi mơjiâng pro.

Troh nôkố, lâp tung kong pơlê Dak Lak hiăng ai 110 tơmeăm OCOP pêi châ sap 3-4 hơlŏng. Tiô troăng rơhlâ mơnhông mơdêk pêi lo tơmeăm OCOP, kong pơlê Dak Lak mơ-eăm troh hơnăm 2025 ai 200 tơmeăm pêi lo châ pơxá OCOP, hơnăm 2030 ai 300 tơmeăm pêi lo châ pơxá OCOP châ ăm hlá mơ-éa mơnhên. Mâu tơmeăm mơdêk ki tơƀrê, lĕm krá, châ pơxá hơlŏng, châ hên kơchơ tung tơnêi têa ƀă kong têa ê vâ rôe.