La ngiâ, a kong pơlê Gia Lai hiăng ai vâ chê 6.700 ha loăng plâi châ pro ăm 99 mah kơxô̆ kơpong pêt ƀă 24 mah kơxô̆ tíu kơxuô. Kố cho tơdroăng vâ tơmeăm pêi lo ing chiâk deăng a kong pơlê tê ngi kong têa ê tung lâp plâi tơnêi. 99 mah kơxô̆ kơpong pêt dêi kong pơlê Gia Lai ki hên châ pro ăm mah ăm mâu ƀăng pêt priât, krui kơxái, hăng, pía kái, plâi gu gá, ƀă hía hé.

Tung mê priât ai 26 mah, ƀăng deăng lối 3.000 hectar; krui kơxái ai 19 mah, ƀăng pêt vâ chê 600 hectar; hăng ai 20 mah kơxô̆ ƀă vâ chê 300 ha. Rơtế ƀă mah kơxô̆ kơpong pêt, mâu khu tê mơdró a Gia Lai hiăng kĭ 24 mah kơxô̆ kơxuô, ƀă tâi tâng dâng 700 tâ̆n plâi tum lĕm/môi hâi. Kơnôm tơniăn tơdroăng ‘na kơpong pêt ƀă kơxuô, tơmeăm pêi lo ing chiâk deăng Gia Lai hiăng châ tê ngi kong têa ê tiô troăng chính ngăch ƀă hên kong têa, môi tiah: Sinuâ, Úc, Mih, Khu tơrŭm Châu Âu ƀă hía hé.

Mâu tơring, pơlê kong krâm, pơlê kong kơdrâm a Gia Lai dế pơtối mơjiâng mâu kơpong pêt tiô pơkâ VietGAP, tŏng kum kuăn pơlê pêi chiâk deăng kĭ mah kơxô̆ kơpong pêt ƀă kơxuô vâ mơdêk roh tơ’lêi tê ngi kong têa ê ăm tơmeăm pêi lo ing chiâk deăng dêi kong pơlê.