Ai lối 1.000 xiâm kơphế sap ing 2 troh 5 hơnăm dêi hên rơpŏng hdroâng kuăn ngo a pơlê O Ngó (cheăm Ia Băng, tơring Đăk Đoa, kong pơlê Gia Lai) nếo tro mơngế ki ‘mêi ko ‘nhê tâi tâng. Tiô pôa Trần Văn Hùng, Kăn hnê ngăn Vi ƀan cheăm Ia Băng, kơxo lơ 13/3, kuăn pơlê a pơlê O Ngó, cheăm Ia Băng châ hlo hên xiâm kơphế dêi kuăn pơlê tro mơngế ‘mêi kếo ‘nhê.

Klêi kơ’nâi riân ngăn, ai lối 1.000 xiâm kơphế tro kếo a xiâm, tâi tâng ƀăng deăng dâng 1 ha. Tiô châ ‘nâi, kơdrum kơphế kố dêi hên rơpŏng hdroâng kuăn ngo a pơlê tơdjuôm dêi pó pêt ƀă rak ngăn. Vi ƀan cheăm Ia Băng hiăng tơbleăng khu râ kăn pơkuâ hnê ngăn cheăng Đảng ủy, hnê mơhno khu kŏng an, kăn ƀô̆ rơtế kăn pơkuâ thôn O Ngó troh ngăn mơnhên; tơdrêng amê tối tơbleăng roh tơdroăng a kŏng an tơring ƀă mâu kơ koan cheăng vâ séa ngăn, tăng ngế ki kếo, pơxâu phâk tiô pơkâ dêi luât.