Pôa Hà Văn Mừng (thôn Lũng Vân, cheăm Ia Lâu, tơring Chư Prông) nếo ko tâi tơdế kơdrum plâi hôt 3 ha. Hên hơnăm rak ngăn loăng plâi ki kâi kong tô khăng khoăng kố, pôa Mừng xuân ôh tá khên vâ kếo loăng plâi hôt, laga plâ 3 hơnăm achê kố, yă plâi hôt kơdroh vâ chê tơdế, pêi lo bu 30% xua mê rơpŏng ôh tá kâi xếo. Ahdrối pôa tối vâ pêt báu a tơnêi kơdrum nếo kếo vâ tơniăn tơdroăng rêh ối rơpŏng:

‘’To lâi hơnăm hdrối, 3 ha châ liăn 200 rơtuh liăn. Laga sap ing ôh tá ai plâi 3 hơnăm kố, yă ôh tá tơniăn mê chôa ‘lâng Kếo. Rơchôa Plei Pai ai têa bê tôh ăm 500 ha mê á gu vâ pêi, châ 8 tâ̆n báu/1 ha’’.

Tơdroăng kếo loăng plâi hôt ai lâp lu tung mâu cheăm tơkăng kong Ia Lâu, Ia Ga, Ia Piơr, tơring Chư Prông, kong pơlê Gia Lai. Krê a cheăm Ia Piơr, sap ing mơ’nui hơnăm 2022 troh nôkố, hiăng ai 300 ha tro kếo vâ pơhlêh pêt loăng plâi iâ hâi, ki hên cho báu, pôm loăng, alâi ƀă hía hé. Pôa Bùi Văn Tiến – Kăn hnê ngăn Vi ƀan cheăm Ia Piơr tối ăm ‘nâi, nôkố, cheăm tá hâi ai pơkâ troăng prôk ki nhên ƀă tŏng kum châ tơƀrê ăm kuăn pơlê tung pơhlêh hdrê pêt. Tơdroăng pêt loăng plâi iâ hâi tung ƀăng deăng pêt loăng plâi hôt ton cho vâ pơtân tê:

‘’Troăng tơmiât pêi dêi pơlê pơla cho mơhnhôk, pơtâng tối kuăn pơlê, ƀăng deăng ki lâi châ tơƀrê mê rak ngăn, ôh tá kếo ôh. Laga ƀăng deăng ki lâi tơbăng, chiâng kái mê pêt pôm, alâi, ... mê cho loăng plâi iâ hâi. Ƀă ƀăng deăng bê têa mê pêt plâi kâ’’.

Tơdroăng kếo – pêt, pêt - kếo drêng trâm yă tơmeăm pêi lo ing chiâk deăng ôh tá tơniăn hiăng ai ƀă hên tơmeăm pêi lo ing chiâk deăng ki pêt hên a Gia Lai môi tiah kơxu, tiu, kơphế, ƀă hía hé, mê nôkố pơtối ai ƀă loăng plâi hôt. Tơdroăng ki kố môi xôh nếo pơkâ thế kơvâ pêi chiâk deăng kal mơnhông mơdêk hnoăng mơnhên troăng prôk la ngiâ tung pơhlêh hdrê pêt ƀă mơjiâng tơdroăng ki vâ pro kơnâ tơmeăm pêi lo ing chiâk deăng a cheăm.