Tung tơdroăng tơkŭm po leh tơbleăng kơphế Ƀuôn Ma Thuột roh má 8, Khu pơkuâ ‘na pêi chiâk deăng ƀă mơnhông thôn pơlê kong pơlê Dak Lak tơrŭm ƀă Kŏng ti pêi cheăng tiô rơnó phon Bình Điền tơkŭm po Hneăng tơ’noăng kuăn pơlê pêi chiâk deăng tơ’noăng hơnăm 2023. Hneăng tơ’noăng kuăn pơlê pêi chiâk deăng tơ’noăng hơnăm 2023 veăng amê ai 6 khu tơ’noăng teăng mâ ăm 6 kong pơlê: Sơn La, Kon Tum, Gia Lai, Dak Lak, Dak Nông ƀă Lâm Đồng.

Mâu ngế tơ’noăng châ rah xo ing mâu tíu cheăng vâ rah xo mâu khu tơ’noăng kuăn pơlê pêt kơphế rơkê má môi kum tung kơmăng tơ’noăng mơgêi. Ƀă dó inâi ‘’Pêt kơphế rơkê kâi trâng ƀă kong prâi hơ’lêh’’, mâu ngế tơ’noăng kô tơ’noăng 4 tơdroăng: Kuăn pơlê pêi chiâk deăng tơmiât pêi rơkê, kuăn pơlê pêi chiâk deăng tơrŭm, kuăn pơlê pêi chiâk deăng rơkê, kuăn pơlê pêi chiâk deăng rơkê hên tơdroăng.

Ing mâu tơdroăng tơ’noăng mâu ngế tơ’noăng hiăng mơhno ki tơná chiâng rơkê, túa ki rơkê tơtro ƀă hlê plĕng ‘na xúa khoa hok kih thuât tung pêt mơjiâng kơphế kâi trâng ƀă kong prâi hơ’lêh ƀă mâu tơdroăng tơdjâk troh uâ mơdiê, kơchơ mơdró, tơdjêp pêt mơjiâng, ai mơnhên, mơjiâng ƀă mơnhông tơdjêp tung kơvâ kơphế Việt Nam.