“Hơ’lêh kơxô̆ tung kơvâ pêi chiâk deăng pơtối ai tơdroăng ki hơ’lêh rơdêi ƀă tơdroăng ki hơ’lêh nhên mâu tơdroăng tơkêa, túa pơkâ hơ’lêh kơxô̆ sap ing peăng Khu xiâm ngăn chiâk deăng ƀă Mơnhông thôn pơlê ƀă mâu kong pơlê” cho tơdroăng ki tối a rôh hôp Khu hnê mơhno hơ’lêh kơxô̆ tung kơvâ pêi chiâk deăng po a kơxo lơ 20/2 a Hà Nội.

Tơdroăng kố xua Khu xiâm ngăn chiâk deăng ƀă Mơnhông thôn pơlê tơkŭm po. Troh nôkố, Khu xiâm ngăn chiâk deăng ƀă mơnhông thôn pơlê hiăng bro ƀă pêi klêi tíu ki ‘măn rak hlá mơ-éa rak ngăn kế kâ tung păn mơnăn ƀă tíu ki păn mơnăn; tíu ki hbru hlá mơéa, rak ngăn mah kơxô̆ kơpong pêt ƀă hbrâ leh tơbleăng ‘na tơdroăng ki tí tăng xiâm rêi kế tơmeăm pêi lo ing chiâk deăng a mơ’nui hơnăm kố.

Tối nhên hơ’lêh kơxô̆ tung kơvâ pêi chiâk deăng môi tung mâu kơvâ cheăng ki kal má môi dêi tơdroăng hơ’lêh kơxô̆ tơnêi têa ƀă tơnêi tơníu mơnhông dêi kơvâ gá kân, pôa Lê Minh Hoan, ngế xiâm ngăn chiâk deăng ƀă Mơnhông thôn pơlê pơkâ thế mâu khu ki tơrŭm tung Khu hnê mơhno cheăng ƀă kăn ƀô̆ cheăng mơdêk, hbrâ tŭm tơdroăng ki rơkê plĕng, ‘nâi nhên tơdroăng túa pơkâ ƀă tơdroăng ki ai khât vâ pêi klêi hnoăng cheăng châ pơcháu.