Hâi lơ 27/4, a Dak Lak, Khu ngăn kơphế Ƀuôn Ma Thuột hiăng tơkŭm  hôp “5 hơnăm kơphế xú lĕm Việt Nam”. Tiô mâu kăn veăng hôp tối, luâ 5 hơnăm (2019 - 2023) hneăng tơ’noăng kơphế ki xú lĕm Việt Nam - Vietnam Amazing Cup hiăng pro mâu tơdroăng  pro kơhnâ ‘na tơdroăng cheăng kâ mơngế pêt kơphế, mơdêk ki lĕm tơƀrê, mơnhông um méa dêi kơphế Việt Nam.

Vâ mơnhông krá tơniăn, mâu kăn pơkâ thế Khu xiâm ngăn pêi chiâk ƀă mơnhông thôn pơlê xúa kơxô̆ ki chêh, mâu tơdroăng kơxô̆ ki chêh ‘măn sap ing 5 rôh tơkŭm po  tơ’noăng kơphế ki xú lĕm Việt Nam, ing mê, vâ tối tâi tâng tŭm tơdroăng ‘na mâu kơpong pêt ki châ kâ pri kân;  pơkâ luât tŏng kum tơtro ‘na hnê mơjiâng tuăn ngôa rơkê, mơdêk hlê plĕng ăm mơngế ki pêt kơphế xú lĕm; tơkŭm po tơ’nôm hên mâu tơdroăng tơbleăng kơphế ki xú lĕm Việt Nam a mâu kơchơ tê mơdró ki rôe tung tơnêi têa ƀă kong têa ê; Mơjiâng  mâu hngêi trung hnê pêi pro ‘na kơphế a mâu kơpong pêt kơphế ƀă tíu tê ƀă yă rơpâ vâ mơhnhôk rế hên uăn pơlê vâ pêt kơphế xú lĕm mơdêk hlê plĕng.