Hôp tơpui tơno xua Khu xiâm pơkuâ ‘na pêi chiâk deăng ƀă mơnhông mơdêk thôn pơlê, tơdroăng tơkêa bro ‘’Tơniăn krúa lĕm kế kâ xua tơdroăng mơnhông mơdêk” (SAFEGRO) ƀă Khu pơtâng tối tơdroăng kal tơnêi têa tơrŭm tơkŭm po, veăng amê ai vâ chê 200 kăn teăng mâ, teăng mâ mâu kơ koan, tíu cheăng dêi Tơnêi têa, mâu kong pơlê, pơlê kong kơdrâm ƀă mâu ngế rơkê kong têa ê.

Hôp tơpui tơno mơdoh chôu veăng tơpui tối ‘na um tâi tâng tơdroăng pơtâng tối tơdroăng hnê hriâm, pơtâng tơdroăng kal, khôi túa lĕm rak tơniăn krúa lĕm kế kâ dêi Việt Nam ƀă lâp plâi tơnêi; troăng pêi pro tơdroăng hnê hriâm, pơtâng tối tơdroăng kal, khôi túa lĕm rak tơniăn krúa lĕm kế kâ.

Xông tơpui a hôp tơpui tơno, pôa Bùi Ngọc Quý, Kăn pơkuâ roh tơdroăng pơlê pơla, Khu pơtâng tơdroăng kal tơnêi têa tối ăm ‘nâi: Hneăng hôp tơpui tơno kô veăng kum mơdêk hlê plĕng, tơmiât pêi pro hiâm mơno lĕm tung pêi cheăng, pơ’lêh tơdroăng pêi pro ki ôh tá tro, mơjiâng khôi túa lĕm ‘na rak kruá tơniăn lĕm kế kâ tung tơdroăng mơjiâng, tê mơdró, xúa tơmeăm kế kâ. Tơdroăng tơkêa bro Rak tơniăn kế kâ xua mơnhông mơdêk xua Chin phuh Canada tŏng kum, ƀă kơxô̆ liăn 15 rơtuh dollars Canada.