Mơjiâng ing hơnăm 2021 ai 7 ngế ki cheăng, mê troh nôkố, Khu ngăn ‘na cheăng Tơrŭm pêi chiâk pêi deăng-Mơdró kâ- Tê rôe Mắc ca Ea H’Leo hiăng ai lối 30 ngế cheăng, pơkuâ ngăn dâng 140 ha loăng kơphế ƀă mắc ca. Hơnăm 2025, kế tơmeăm ki mơjiâng lo ing mắc ca dêi khu ngăn’na cheăng tơrŭm hiăng châ mơ’no tê tiô inâi ki xiâm troh a Hàn Quốc, tơdrêng amê, châ pơxá inâi Kế tơmeăm ki mơjiâng ing kơmăi kơmok, pêi cheăng ƀă kŏng dêi thôn pơlê ki lĕm tro, tơmeăm ki dâi khât châ kơdeăn tơxâng ƀă tơdroăng pơkâ dêi tơnêi têa, klêi kơ’nâi châ kâ Pri Mai An Tiêm hơnăm 2024.

Tiô pôa Nguyễn Trọng Huê, Kăn hnê ngăn Khu pêi cheăng tơrŭm tối ăm ngin ‘nâi, ki ƀlêi trâng mê, ôh tá xê to ing hnoăng ki po rơdâ kơpong ki pêt mơjiâng kế tơmeăm lơ thăm mơdêk ki dâi lĕm dêi kế tơmeăm, mê ối pơhlêh tuăn tơmiât tung pơkuâ ngăn, ki tơdrăng khât tung pơkuâ ngăn ƀă pơtối modêk hnoăng cheăng dêi tơrêm ngế cheăng.  

“Túa cheăng dêi Khu ngăn ‘na pêi cheăng tơrŭm cho túa cheăng ki châ mơnhông trâm hên tơpá má môi, laga, tâng xúa pêi pro tro kô rĕng châ mơnhông ƀă krá tơniăn. Vâ tơdroăng cheăng lĕm tro tâ nếo kal ai tơdjêp troh túa ki cheăng tơdrăng ‘na mâu tơdroăng ki tối tơbleăng ‘na liăn ngân, xing xoăng hnoăng cheăng, hnoăng pêi pro ăm rêm ngế mê Khu ngăn’na cheăng tơrŭm kô châ mơdêk hên tâ”.

Tơdrêng ƀă tơdroăng ki pơhlêh, hên Khu ngăn’na cheăng tơrŭm a kong pơlê Dak Lak dế vêh mơnhên ki châ tơƀrê dêi túa cheăng ki tơdjêp tung pêi chiâk pêi deăng, ‘na cheăng kâ. A Khu ngăn ‘na cheăng tơrŭm Nông Nghiệp-Dịch vụ Công bằng Ea Tu, bêng Tân Lập, ai 49 ngế cheăng, tung mê, ai 90% cho pơ’leăng mâ mơngế kuăn ngo, dế pơkuâ ngăn lối 250 ha kơphế. Kơnôm pêi cheăng tro tiô pơkâ, mê kơphế dêi Khu ngăn ‘na cheăng tơrŭm đi đo châ tê dêi kơphế ƀă yă ki kơnâ tâ ing 10 troh 25 rơtuh liăn rêm hơnăm. Tối ‘na tơdroăng cheăng dêi tơná, pôa Nguyễn Đình Trọng, Kăn hnê ngăn Khu cheăng tơrŭm tối ăm ngin ‘nâi:

“Khu cheăng tơrŭm athế tơnăng dêi xêh tơdroăng cheăng pê, ôh ta khoh vêh tơkôm to vâi tơveăng gum, ki ahdrối pin athế pê pro lĕm tro, tơdroăng ki loi tơngah  tung pêi cheăng â ing mê ah, mâu ngế ki tơrŭm cheăng vâi kô lăm pôu xêh pin, mê cho tơdroăng cheăng ki xiâm pin athế pêi pro ahdrối, ing peăng Tơnêi têa ôí tơveăng gum cho môi pâ vâ ing mơjiâng mơjiâng gum ăm tơná pin prôk rĕng tâ, ôh tá xê to tơkôm tơngah ai tơdroăng tơveăng gum tâi tâng dêi Tơnêi têa”.

Ối a cheăm Ea Ñuôl, kong pơlê Dak Lak, Khu ngăn ‘na Chiâk deăng ƀă Mơdró kâ Ôm hyô Phú Nông Ƀuôn Đôn vêh tăng rah xê troăng hơlâ prôk ki mơnhông ivá, kế tơmeăm ki tơná ai drêng tơrŭm cheăng chiâk deăng ƀă ôm hyô ki ăm kuăn pơlê vâ châ hlo, châ ‘nâi. Mơjiâng ing hơnăm 2019 nah, troh nốkố, Khu ngăn ‘na cheăng tơrŭm hiăng ai 46 ngế rơtế veăng tơlo dêi liăn ngân, tơveăng mơnhông túa cheăng chiâk deăng-ôm hyô pro mơjiâng tâ tá long on tơhrik Srêpok 3. Pôa Trần Văn Toàn, Kăn ngăn Khu ngăn ‘na cheăng tơrŭm tối ăm ngin ‘nâi, tơdroăng ki khoh mơjiâng pro châ ƀlêi trâng ôh ta xê to kơxô̆ liăn mê cho ing tơdroăng ki tơrŭm ƀă rơtế tơveăng gum pôu râng hnoăng cheăng pơla mâu ngế tung khu, vêh séa mơnhên ngăn ivá cheăng ƀă pơtối mơdêk ivá cheăng ki tơná ai dêi kong pơlê, cheăm bêng tơná.

“Ngin hiăng hbrâ rơnáu tung tơdroăng tơveăng mơ’no liăn tro tiô luât ki ăm mung a tơrêm pơlê cheăm vâ mơ’no liăn gum ăm mâu túa cheăng dêi khu ngăn ‘na cheăng tơrŭm ki hiăng tí tăng rah xêh, xo péa tơdroăng cheăng ki xiâm vâ pro troăng ki xiâm mơnhông mê cho pêi chiâk pêi deăng hnối tơrŭm ƀă kơvâ ôm hyô ki vâ tí tăng ‘nâi ‘na long hngêi kơmăi on tơhrik Srêpok 3. Ing hâi ki pơxiâm châ mơjiâng pro nah, kơpong ki mê ta hâi ai kơdrum deăng, hên tơnêi ki lôi chúa tê kơtê, mê troh nôkố hiăng mơjiâng môi kơpong ki ai hên nhâ loăng lĕm drêh, ai hên kế tơmeăm, tơ’mot hên khu tơmối mot ôm hyô”.

Dak Lak dế nôkố ai lối 1.220 Khu ngăn ‘na cheăng tơrŭm ai lối 185.000 ngế. Tíu ki kố ga tơ’lêi hlâu vâ mơjiâng Khu ngăn ‘na cheăng tơrŭm ki kân tung kơvâ pêi chiâk pêi deăng, ‘na tơdroăng pêt mơjiâng kong, ‘na kơvâ păn tơnăng ká xixŏng, ôm hyô pơlê pơla, cheăng kơmăi kơmok ki uâ mơdi kế tơmeăm ƀă logistics. Méluâ ti mê, a Dak Lak nếo xiâm ai dâng 20% Khu ngăn ‘na cheăng tơrŭm tơveăng pêi mâu tơdroăng ki tơrŭm, tung pơla mê, ai dâng 80% xuân ối pêi cheăng krê xêh ngó, ing mê, tí tăng khu ki tơrŭm vâ rôe xo kế tơmeăm ki pin mơjiâng bro. Kố cho kơnâng ki kâng kơdât kân, pro tơdroăng cheăng kâ tơdjuôm tá hâi teăm kâi châ mơnhông mơdêk hên ivá, tơmeăm khoăng ki tơná ai.

Tơdroăng pơkâ Hneăng hôp kân Đảng ƀô̆ kong pơlê Dak Lak hneăng hơnăm 2025-2030 vêh mơnhên, tơdroăng cheăng kâ tơdjuôm cho môi tung mâu hnoăng cheăng ki kal kân vâ rak vế, pêi pro hnoăng cheăng xiâm ki thăm pêi lo kế tơmeăm GRDP ing 11% rêm hơnăm tơngi klêng tung hên hơnăm la ngiâ. Pôa Lương Nguyễn Minh Triết, Ngế cheăng tung Tíu xiâm Đảng, Kăn pơkuâ hnê ngăn Đảng kong pơlê Dak Lak ai tối ‘na tuăn mơno tơná, Khu tơrŭm cheăng mê pơkal athế tơkŭm mơnhông mơdêk ivá cheăng ki kân tâ tung hnoăng cheăng, mơnhông tiô troăng cheăng dêi Khu ngăn na tơrŭm cheăng tiô túa ki nếo, hnối pêi adrêng tung cheăng khoa hok kŏng ngê̆, pơhlêh ki hlê hlê rơkê plĕmg, xúa tơdroăng chêh ‘măn tung măng internet, pêi cheăng kâ ki vêh mơnhông, ‘na pêi chiâk pêi deăng ai tơrŭm troh hên tơdroăng cheăng ki tơdjâk ƀă hnối tơrŭm cheăng kal kí.

“Khu ngăn ‘na tơrŭm cheăng tơrŭm dêi kong pơlê kal athế tơkŭm pêi pro thăm mơdêk ki tơƀrê, ai pơxúa tung hnoăng cheăng dêi mâu Khu ngăn ‘na cheăng tơrŭm, rế mơnhên ngăn kế tơmeăm ki pêi lo hên iâ to lâi, rế séa mơnhên ngăn kế tơmeăm dâi lĕm lơ ôh, tơkŭm mơjiâng mâu túa cheăng tơrŭm tiô túa nếo, malối tung pơhlêh túa cheăng tung pơkuâ ngăn, rak vế hnối vêh mơnhên xiâm kối, ‘na tê mơdró kâ điê̆n tưh ƀă hnối tơrŭm ƀă tíu tê mơdró; pêi tơdrêng ƀă tơdroăng xúa khoa hok kŏng ngê̆, cheăng kơxô̆, tơkéa vâ tối tŭm tởoăng chêh tối pơrá chêh bro tung kơmăi ƀă ‘mot tung măng internet tâi tâng, túa pêi cheăng kâ drêh krúa, cheăng kâ ki mơjiâng tơmeăm pơtối vêh mơjiâng kế tơmeăm, pêi chiâk pêi deăng ki ai hên hdrê loăng ki lĕm ai pơxúa, pêi chiâk deăng ki xúa to phon mâu nhâ hlá ƀă hnối tơrŭm tung hên khu ki ai tơdjâk vâ thăm pro kế tơmeăm rế khá”.

Ing mâu túa cheăng dêi Khu ngăn ‘na cheăng tơrŭm ki pêi châ tơƀrê a kong pơlê Dak Lak xuân chiâng hlo, khu ngăn ‘na cheăng tơrŭm hâi kố ôh tá xê ối to túa cheăng chiâk deăng ki pro pơxúa ăm to tơdroăng ki tơveăng gum xếo. Drêng xúa mâu kế tơmeăm ki kal tung chal nếo nôkố pro xiâm, mê tơdroăng ki tơrŭm cheăng mê thăm rế pro ivá ki xiâm ƀă pro pơxúa ăm mâu ngế ki mot cheăng mê, cho khu ki kal xiâm, mâu khu ngăn ‘na cheăng tơrŭm mê dế hiăng chiâng kông tơdjêp djâ kế tơmeăm pêi lo ing chiâk deăng Dak Lak châ mơnhông troh a hngêi kơchơ, tơveăng gum rê hía rế thăm mơdêk ki mơnhông cheăng kâ a pơlê cheăm tơná.