Klêi mâu rôh kong mêi khế 7, hên kăn ƀô̆ mâu ngế pêi cheăng a Kơdrum kong Yok Đôn ăm rơxế kân chơ hrĭng xiâm loăng rơnâng mơheăm ing kơdrum mơdâ hdrê troh a Poh kong kơxô̆ 526 vâ pêt hdrê loăng ki mê. Pôa Nguyễn Trung Hiếu, Ngế phŏ Ƀơrô Khoa hok ƀă Tơrŭm cheăng lâp plâi tơnêi, Kơdrum kong ilâng Yok Đôn ăm ‘nâi, 100% loăng kŭn ki mơdâ pro hdrê a kơdrum nhâ loăng, kloăng hdrê tơkŭm xo ing mâu loăng ki kân tung kơdrum.

Tung pơla tí tăng ‘nâi plĕng mơdâ hdrê châ pêi pro sap ing vâ chê 2 hơnăm hdrối, troh nôkố, hiăng mơdâ ƀă pêt châ lối 1.000 xiâm loăng kŭn a hên ƀă kong. Pôa Nguyễn Trung Hiếu tối ‘na tơdroăng mơdâ ƀă pêt loăng rơnâng mơheăm a kơdrum kong ilâng Yok Đôn tung pơla hdrối kố nah.

“Apoăng pin thế séa ngăn mâu kơpong ki hlo ai loăng rơnâng mơheăm, klêi mê riân ngăn vâ ‘nâi ki tĕng lơ preăng dêi loăng, klêi mê hdró mâu tíu mê ah vâ pêt ăm tơtro ƀă kơpong ki pêt loăng. Klêi mê tối ‘na tơdroăng ki pơxúa dêi loăng rơnâng mơheăm a mâu kơpong kong kân dêi Kơdrum kong ilâng Yok Đôn. Ngin phiu ro, xua hiăng veăng pêi hnoăng cheăng a tơdroăng pơtối râk hdrê loăng ki kơnâ cho loăng rơnâng mơheăm a Kơdrum kong ilâng Yok Đôn”.

Loăng rơnâng mơheăm chhá loăng gá kân, xŏn troh 25 met, vâ tối xâ ki kân mơgăn troh 1 met. A kong pơlê Dak Lak, loăng huăn hên tung kơdrum kong Yok Đôn, Kơpong rak ngăn kong Ea Sô... Loăng rơnâng mơheăm vâ tối gá kơtô, krá kâk, lĭng gá ai um lĕm, cho loăng kơnâ git má môi tung mâu hdrê loăng ki vâ pong rơgi pro tơmeăm ki kố ki mê. Hên hơnăm hdrối mê hía nah, xua tơdroăng vâi tăng ko loăng hmâng vâ pro loăng kong kố rế pá ai.

Pôa Nguyễn Hữu Tạo, Kăn phŏ rak ngăn loăng kong kơdrum kong Yok Đôn tối, nôkố tung kơdrum kong Yok Đôn ối dâng pá xôp 200 xiâm loăng rơnâng mơheăm ki hiăng kân, tâng ôh tá rĕng mơdâ pro hdrê nếo vâ pêt, mơni kố hía tâi khu hdrê loăng ki kố a kơdrum kong ilâng kân. Tiô pôa Tạo, tơdroăng tí tăng hriăn mơdâ hên hdrê loăng, hên túa loăng kơnâ Nhóm II A kố, kum veăng pơtối rak gen loăng ki kơnía git, veăng kum mơdêk pêt kong, xuân môi tiah pơtối rak hên túa sinh học.

Pôa Nguyễn Hữu Taọ tối:

“Khu ngăn Kơdrum hiăng tơbleăng tơdroăng tơkêa bro tí tăng ‘nâi plĕng ‘na khoa hok vâ pơtối mơdêk pêt mâu hdrê loăng rơnâng. Nôkố kơdrum mơdâ hdrê hiăng mơdâ hên ƀă dế tí tăng ngăn mâu tíu vâ pêt tung kong a mâu kong tơnêi  lĭng  tíu ki tơtro, ƀă kô xoăng hdrê loăng mê ăm kuăn pơlê tung kơpong djâ pêt tung kong pêt hên hĭn vâ rế ai hên hdrê loăng ki mê. Tơdroăng mơdêk pêt hên loăng rơnâng kô veăng kum mơnhông cheăng kâ ăm kuăn pơlê”.

Kơdrum kong Yok Đôn dêi Dak Lak ai tơnêi kân rơdâ má 2 tung lâp tơnêi têa, ƀă lối 115.000 ha. Kong akố ai hên nhâ loăng ki tơviah lĕm, mâu kuăn kiâ kong, nhâ loăng huăn a tơdế kong kân ngiât, kong ai loăng kân preăng prêh  hlá gá tơruih tiô rơnó. Tiô pơkâ, tung rơnó mêi hơnăm 2023 kố, Kơdrum kong Yok Đôn kô mơdêk mơdâ hdrê ƀă kum dâng 3.000 xiâm hdrê kŭn, hdrê loăng rơnâng mơheăm vâ ăm kuăn pơlê pêt a kơpong kong kĭng têa ƀă pêt kong a mâu kơpong rơtâ tá kơdrum.