Kơxo lơ 16/8, Khu ngăn Khoa hok ƀă Kong ngê̆ kong pơlê Kon Tum tơkŭm diâp Hlá mơ-éa hnoăng rak xúa hnê mơhno tơnêi tơníu “Ngọc Linh” sâm ăm 2 kŏng ti a kong pơlê. Kố cho rôh apoăng kong pơlê Kon Tum hbru hlá mơ-éa mơnhên kố ƀă sâm Ngọc Linh. Tiah mê, Kŏng ti tơlo liăn sâm Ngọc Linh Kon Tum châ hbru ăm hlá mơ-éa mơnhên xúa tơnêi tơníu “Ngọc Linh” ăm 10 rơpâu pôm sâm lối 10 hơnăm.

Tíu pêt sâm Ngọc Linh dêi Kŏng ti kố cho a lô 3, khoảnh 2, poh 220 ối tung cheăm Măng Ri, tơring Tu Mrông. Ƀă Kŏng ti tơlo liăn sâm Ngọc Linh Tu Mrông Kon Tum, Khu ngăn Khoa hok ƀă Kong ngê̆ kong pơlê Kon Tum diâp Pơkâ ‘na tơdroăng ki hbru mơ-éa mơnhên hnoăng rak xúa hnê mơhno tơnêi tơníu “Ngọc Linh” ăm 2.200 pôm sâm ki lối 6 hơnăm. Tíu pêt sâm Ngọc Linh a lô 17b, khoảnh 5, poh 227 thôn Mo Za cheăm Ngọc Lây, tơring Tu Mrông.