Kơ koan xiâm pơkuâ pêt loăng plâi ƀă rak vế hdrê kơchâi - plâi - pôm kong pơlê Kon Tum nôkố dế hnê mơhno tơdroăng pêt, rak ngăn Sâm Ngọc Linh ăm vâi krâ kuăn pơlê hdroâng kuăn ngo Rơteăng a kơpong pêt sâm Ngọc Linh ối tung péa tơring Tu Mrông ƀă tơring Đăk Glei. Veăng lâm hnê mơhno, hrĭng ngế pêi cheăng hdroâng kuăn ngo Rơteăng a mâu cheăm, môi tiah Ngọc Lây, Măng Ri... tơring Tu Mrông; Mường Hoong, Ngọc Linh tơring Đăk Glei kô châ hnê tơdroăng mơdâ, pêt, rak ngăn, rak vế troh lâk xo pôm sâm Ngọc Linh.

Kih sư Nguyễn Tài Lương, Kơ koan xiâm pêt loăng plâi ƀă rak vế hdrê kơchâi plâi pôm kong pơlê Kon Tum tối ăm ‘nâi ‘na hbrâ mơdât ôa hdrong kâ ‘nhê sâm Ngọc Linh xông kân, xông lĕm ƀă pêi lo châ hên, dâi lĕm. Tung mâu hơnăm hiăng hluâ tơdroăng pêt loăng sâm Ngọc Linh hiăng kum hên rơpŏng mơngế hdroâng kuăn ngo Rơteăng a 2 tơring Tu Mrông, Đăk Glei dêi kong pơlê Kon Tum hluăn kơtiê ƀă mơ-eăm pro kro mơdrŏng. Troh nôkố kong pơlê Kon Tum hiăng pêt lối 1.700 ha Sâm Ngọc Linh.