Lâp tơring ai dâng 500 ha xiâm loăng kơphế ôh tá bê têa tôh, tung mê ki hên cho xiâm loăng kơphế. Nôkố mâu rơchôa, long, hno têa tung tơring ôh tá ai têa vâ tôh xua mê kuăn pơlê thế ti tăng, xing xoăng dêi pó têa ki ối iâ ing mâu klôh, têa tŏng ing hơngế vâ tŏng kơdrum loăng plâi.

Tơdroăng kong tô khăng khoăng ôh tá tơniăn ƀă ôh tá bê têa tôh hiăng pro hên ƀăng deăng kơphế a tơring Đăk Hà tro chếo hlâ; plâi kơbâng ƀă tơkâng tro khăng. Tro lŭp ó ƀă ƀăng deăng kơphế nếo vêh pêt troh hrĭng hectar dêi Kŏng ti kơphế Đăk Uy ƀă kuăn pơlê a cheăm Hà Mòn.

Rơtế ƀă kơxô̆ liăn rak ngăn tâk hên, kơdroh pêi lo, roh kong tô khăng khoăng ôh tá tơniăn ƀă tơdroăng kong tô khăng khoăng ton xŏn ối pro tơdjâk ton xŏn ƀă xiâm loăng kơphế. Ƀă mâu kơdrum loăng plâi kŭn ivá ôh tá kâi trâng mê rêi tro tơdjâk. Rêi tro tơdjâk mê mâu kơmeăn, pơreăng xông kâ ‘nhê a rêi pro xiâm loăng hlâ.