Hâi lơ 5/6, a kong pơlê Kon Tum po hên tơdroăng cheăng ai pơxúa drêng pêi pro tơdroăng Hâi hyôh kong prâi lâp plâi tơnêi lơ 5/6 . A tíu tơbâ roh ton nah Tíu a ‘ngêi 1049, dêi cheăm Hơ Moong, tơring Sa Thầy, Vi ƀan kong pơlê Kon Tum tơkŭm po Leh mơhnhôk Têt Pêt loăng đi đo mơjo pâ Pôa Hồ ƀă pêi pro vâ rak hâi Hyôh kong prâi lâp plâi tơnêi lơ 5/6 hơnăm 2023.

 Klêi Leh mơhnhôk, mâu kăn veăng pêt 2.500 xiâm loăng hngó 3 kơtâ hlá ăm lĕm mơnâ mâ ƀă rak vế hyôh kong prâi kơpong rơtâ tá tíu tơbâ. Tơdroăng pêt loăng ngiât veăng rak vế hyôh kong prâi pro lĕm mơnâ mâ a mâu tíu tơbâ ton nah ƀă kơpong ôm hyô xuân châ hên mâu tơring, pơlê kong kơdrâm dêi kong pơlê tơkŭm pêi.

Tung hơnăm kố, kong pơlê Kon Tum pơkâ pêt nếo 4.000 ha kong ƀă 600.000 xiâm loăng tơprâ tơprŭng. Tung 5 hơnăm hneăng hôp kân má 16 dêi Đảng bộ kong pơlê Kon Tum pơkâ kô mơ-eăm pêt nếo 15.000 ha kong ƀă 3 rơtuh xiâm loăng tơplâ tơprŭng.