Xua tơdjâk dêi kong prâi pơ’lêh ing rơnó tô mơdrăng chiâng rơnó mêi, a tơring Tu Mơ Rông, kơpong  pêt Sâm Ngọc Linh dêi kong pơlê Kon Tum hiăng ai hên rôh kong mêi príu. Vâ ví ki tro lup xua kong mêi príu pro môi tiah hơnăm nah, mâu kăn ƀă kơvâ cheăng ngăn ‘na pêi chiâk dêi tơring hiăng hbrâ hnê tối ăm mơngế kuăn pơlê ki pêt Sâm Ngọc Linh hbrâ  rơnáu ƀă hyôh kong prâi ôh tá tơniăn vâ rak dêi kơdrum loăng.

Troh nôkố kong pơlê Kon Tum  hiăng po rơdâ deăn pêt lối 1.700 ha Sâm Ngọc Linh, tung mê kuăn pơlê pêt xêh dâng 70 ha ƀă ki hên cho deăng pêt dêi Khu mơdró. Ƀă ki pơxúa vâ pro pơkeăng hlối tê kơnâ, nôkố rêm xiâm loăng Sâm Ngọc Linh hdrê ki 1 hơnăm tê ai yă dâng 300.000 liăn. Tung khế 3 kô nah mâu rơpŏng kơtiê, vâ chê kơtiê tung tơring hiăng mung vâ chê 9  rơtal liăn ‘no pêt Sâm Ngọc Linh.

A hơnăm nah kong mêi príu ƀă hlối ai pơreăng tâ tú hiăng pro chât rơpâu xiâm Sâm Ngọc Linh dêi kuăn pơlê a kong pơlê Kon Tum  hlâ lup hên ‘na cheăng kâ. Vâ kum kuăn pơlê tơkâ luâ xơpá xua lup, tơdrêng ƀă pêi pro hdró chĕn, pro ăm ton hâi tơvêh chê̆n dêi Hngêi rak liăn, ai mâu khu mơdró xuân hiăng veăng kơjo kum tê kơtê hdrê Sâm Ngọc Linh vâ pêt nếo a tíu ki loăng hiăng hlâ