Ƀă khŏm mơ-eăm pơkuâ ki dâi lĕm vâ kring rak inâi sâm Ngọc Linh, kong pơlê Kon Tum mơ’no vâ chê 12 rơtal liăn rôe 2 toăng kơmăi séa ngăn DNA ƀă mơnhên trếo sinh hok Saponin sâm Ngọc Linh. Laga xua tá hâi chiâng xúa kŏng ngê̆, nôkố kơvâ cheăng dêi kong pơlê xuân dế ối xêk xêng ƀă kơmăi kơmok chal nếo kố.

Troh nôkố, klêi kơ’nâi vâ chê 5 khế rôe tŭm kơmăi kơmok, tiâ rơkong kơ-êng a Hneăng hôp má 5, Hô̆i đong kong pơlê Kon Tum hneăng má XII pơla kố nah, pôa Bùi Thanh Bình, Kăn pơkuâ Khu pơkuâ khoa hok ƀă Kŏng ngê̆ kong pơlê Kon Tum tối ăm ‘nâi, vâ xúa mâu kơmăi kố, sap ing tá hâi rôe kơmăi kơmok Khu hiăng hbrâ pơtroh 4 ngế kăn ƀô̆ kŏng chưk lăm hriâm ƀă mâu kăn ƀô̆ kố xuân hiăng chiâng xúa kŏng ngê̆.

Laga, ai tơdroăng ki nếo tá hâi ‘nâi tâi. Tơdroăng tơkêa bro rôe 2 toăng kơmăi mơnhên ki lĕm sâm Ngọc Linh xua Khu pơkuâ Khoa hok ƀă Kŏng ngê̆ kong pơlê pơkuâ mơ’no liăn ƀă kŏng ngê̆ séa ngăn DNA ƀă séa ngăn mơnhên mâu trếo sinh hok Saponin ai tâi tâng kơlo liăn mơ’no vâ chê 12 rơtal liăn, tung mê krê kơxô̆ liăn rôe kơmăi kơmok lối 8 rơtal 300 rơtuh liăn.