Ngoh Kpă Meo kot mâ tung môi rơpŏng hngêi a pơlê Tung (Cheăm Ia O, tơring Čư̆ Prông). Xua tơdroăng rêh ối xơpá mê ngoh bú hriâm troh lâm 9. Hơnăm 2003, ngoh xo on veăng ƀă pơxiâm pêi cheăng bă ai 2ha tơnêi  nôu pâ ăm, vâ pêt mâu prá alâi ƀă kơphế. Troh hơnăm 2007, hlo kơxu châ pơxúa hên, ngoh ‘no 150 rơtuh liăn pêt tơ’nôm 4 ha kơxu. Hơnăm 2009, ngoh po rơdâ tơ’nôm 3 ha kơxu. La hên hơnăm kơ’nâi mê ta trôh nôkố kơxu chu rơpâ yă hên mâu kuăn pơlê trâm pá ‘na cheăng kâ. ngoh Meo kơmăng tơchĕng tơmiêt hên ôh tá koi vâ tăng troăng pêi ki nếo ăm dêi rơpŏng hngêi.

Hlo hên cheăm tơring hiăng xúa tuá pêt plâi kâ ki châ pơxúa hên, hơnăm 2015, ngoh tơpui ƀă dêi mâi rôe tơ’nôm 4ha tơnêi vâ pêt mâu plâi mit Siam, plâi treăng ngóu, pêt priât, ƀơr, plâi sầu riêng... pêt tơvât tung kơdrum:

“Apoăng pơ’lêh pêt loăng plâi á xuân trâm hên xơpá. Xua á hâi hlê túa pêi cheăng tơdroăng pêt loăng pơlâi ối trâm xơpá xua tro hên hdrong, mâu hmui kâ ‘nhiê. Tơdroăng vâ ‘nâi kơnó loăng tro pơreăng cho 1 tơdroăng ki pá ‘nâng. Xuân tí tăng ‘nâi plĕng ing pơchuât hlá mơ-éa, hmâng rơ’jiu hnê, hriâm ing mâu rơpŏng kuăn pơlê ki hiăng pêt hdrối tơƀrê mê kơdrum loăng plâi xuân chôa tơniăn ƀă ai plâi hên tê châ xo liăn hên''.

Tơƀrê tung pêi cheăng kâ dêi rơpŏng hngêi rôh apoăng ƀă kơ’nâi mê á xuân veăng kum vâi krâ nhŏng o tung pơlê, mâu đoân viên droh rơtăm tung pơlê ki vâ mơ-eăm pêi cheăng hnê kih thuât pêt rak ngăn vâ mơnhông cheăng kâ ăm dêi rơpŏng hngêi’’.

Vâ hmâ ƀă pêi chiâk, ngoh Kpă Meo hiăng mơ-eăm hriâm, veăng hriâm lâm hnê xúa khoa hok kih thuât a cheăm hnê. Ngoh xuân hiăng troh hên kơpong vâ lăm tăng hriâm túa pêi cheăng vêh a hngêi xúa pêi tiô tơdroăng tơná hlê hiăng hriâm, ƀă tơnêi tíu tơtro ƀă hyôh kong prâi. Hlối hriâm, hlối pêi, ngoh hiăng châ veăng hriâm mâu lâm hnê bôh tuk, trung kâp luâ̆t, Trung cấp Lý luận chính trị, chiâng đảng viên.

Troh nôkố, ngoh hiăng châ rah xo pêi hên kơvâ cheăng môi tiah pro: Kăn phŏ hnê ngăn Đoân Droh rơtăm cheăm, Kăn hnê ngăn Đoân Droh rơtăm cheăm Ia O ƀă nôkố cho Kăn hnê ngăn Vi ƀan Măt trâ̆n tơnêi têa Việt Nam cheăm.

Hên hơnăm cho kăn pơkuâ hnê ngăn đoân cheăm, ngoh Kpă Meo hlê ti lâi xua kuăn pơlê a cheăm ối ối kơtiê cho xua hâi hlê xúa khoa hok kih thuât tung pêi chiâk, xuân ối pêi cheăng, păn mơnăn tiô tơdroăng ôh kâi tơƀrê dêi chal ton nah. Xua ti mê, Kpă Meo ối đi đo hnê ăm mâu đoân viên, droh rơtăm tung cheăm ‘na túa pêi chiâk vâ xúa tung pêi cheăng rêm hâi, mơ-eăm mơnhông pro kro mơdrŏng.

Nâ Siu Nhi, kăn phŏ hnê ngăn Đoân Droh rơtăm cheăm Ia O ăm ‘nâi:

“Tung mâu hâi tơkŭm hôp tung thôn pơlê ngoh Kpă Meo xuân hmâ tối ƀă mâu droh rơtăm, ƀă kuăn pơlê tung pơlê mâu túa mơnhông cheăng kâ, vâ mâu rdroh rơtăm  ai troăng rơhlâ hriăn pêi cheăng ki pro pơxúa má môi’’.

Rơpŏng ngoh Kpă Luyn, mơngế rơtế tung pơlê, kơnôm hriâm tiô ngoh Kpă Meo mê ngoh hiăng pêt 3 sao loăng plâi mit, klêi mê pêt tơvât tung kơdrum deăng vâ mơnhông cheăng kâ ăm rơpŏng hngêi. Ngoh Kpă Luyn tối:

“Ing mâu tơdroăng ôh tá hlê ki klâi vâ mơnhông cheăng kâ ngoh Kpă Meo hmâ tối ăm kuăn pơlê, tâng ôh tá ‘nâi a tíu ki lâi mê ngoh kô hnê ăm kuăn pơlê ‘nâi pêt mâu hdrê loăng plâi kâ, pro ti lâi vâ loăng plâi ki pêt ai plâi hên vâ mơnhông cheăng kâ rơpŏng pŏng hngêi’’.

Tơdroăng kuăn pơlê nhoăm ai sap ing pêi hnoăng cheăng Đoân nah, nôkố  pro kăn hnê ngăn Măt trâ̆n tơnêi têa Việt Nam dêi cheăm Ia O, ngoh Kpă Meo dế pêi tro hnoăng cheăng tơná. Pôa Ngô Văn Trường, Kăn hnê ngăn Vi ƀan cheăm Ia O tối: Ƀă hnoăng cheăng ki pơcháu, Kpă Meo đi đo tơkŭm po mâu rôh tơkŭm hôp hnê kuăn pơlê, mơhnhôk kuăn pơlê tung cheăm Ia O pêi tro troăng rơhlâ dêi Đảng luât tơnêi têa, ngoh ối lăm pôu tơrêm rơpŏng mơhnhôk kuăn pơlê hmiân tuăn mơ-eăm pêi cheăng kâ, mơnhông dêi rơpŏng hngêi rêh ối tơƀrê, pôi rĕng tơmâng loi khu ‘mêi pơlông djâ pro tơdroăng ki chiâng tơklâ, pro ti tơrŭm tung kuăn pơlê.

Pôa Ngô Văn Trường, ăm ‘nâi:

“Peăng kong pơlê xuân tối, ngoh Kpă Meo tơmiât tro rơkê, rĕng ‘nâi ‘na kơchơ mơdró, rĕng pơ’lêh tơdrêng túa pêi cheăng kâ ki rĕng tơƀrê mê cho tung pêi chiâk pêt loăng plâi ƀă păn ro, chu, í, châ xo tơ’mot liăn hên ăm rơpŏng hngêi.Kố cho ngế ki pêi cheăng rơkê ôh tá xê to kuăn pơlê hdroâng kuăn ngo ki rêh ối a kố, mê mâu rơpŏng mơngế Xuăn  xuân thế hriâm há vâ ai troăng pêi cheăng mơnhông tơbrê’’.