Mâu hâi ki kố, a chiâk rơdâ 3 ha a thôn 10, cheăm Hòa Phú, pơlê kong kơdrâm Buôn Ma Thuột, prếi on veăng ngoh Hoàng Văn Hồng rơtế ƀă mau ngế pêi cheăng dế ‘mâi rơnêu klŏng ƀet tôh têa ƀă ‘mâi mơdâng trăng ki tóu hnông priât. Ngoh ăm ‘nâi, rơpŏng hngêi pơxiâm pơhlêh tơnêi pêt kơchâi ƀă alâi pêt priât nếo ing apoăng hơnăm 2021. Xiâm priât ôh tá xê to gum pêi lo liăn ngân mê ối cho hnoăng rak ngăn kơdroh xahpá ga hôm há.

“Hơnăm kố mơngế ki rôe lăm troh ngăn a kơdrum tối vâ rôe tâi priât. A bú riân ngăn tâi tâng kơxô̆ liăn châ xo ing 3 ha priât mê châ dâng 1 rơtal liăn, rêm ha châ xo tơkâ dâng 200 rơtuh liăn. Pêt priât ối kum kơdĭng tá hnoăng pêi po nhâ tâng vâ pơ chông ƀă pêt alâi, kơchâi. Thăm nếo, priât bú pêi môi hơnăm hiăng châ ko, mê tá ‘no liăn hên môi tiah mâu loăng plâi ton hơnăm môi tiu lơ ƀơr mê ton tâ’’.

Ngoh Đậu Văn Tuấn, ối a thôn 5, cheăm Hòa Phú, pơlê kong kơdrâm Buôn Ma Thuột, pơxiâm pêt priât ing hơnăm 2020. Ƀă 5 ha hiăng châ tê tơniăn, ngoh hbrâ vâ po rơdâ deăng pêt hên luâ tâ péa hdroh drêng kĭ tơkêa mung pêi tơ’nôm tơnêi ing kuăn pơlê tung kơpong. Ngoh Tuấn ăm ‘nâi:

“A kơpong Hòa Phú kố, ngin xúa hhdrê priât Siam môi túa hdrê, xo ing kơpong Ba Vì, kong pơlê Hà Tây ton nah djâ pêt akố. Vâ priât rĕng kân ƀă ai hnông kân priât hên, ngin rah hdrê priât ki piê lĕm, ngăn rơdêi rĕng kân vâ pêt. Priât Siam tơtro ƀă tơnêi hngêi kong prâi a Dak Lak, xua mê, priât pêt akố rĕng kân ƀă ngiât lĕm”.

Pôa Nguyễn Văn Kha, kăn pơkuâ ngăn khu mơdró priât a kong pơlê Dak Lak lo ing kong pơlê Hưng Yên, tối ăm ‘nâi, rêm hơnăm, pôa hmâ rôe châ dâng rơtal tâ̆n priât vâ mơ’no tê troh a mâu kong pơlê kopwong peâ Kơnhŏng, ƀă hnối tê mơ’no troh mâu kong têa vâi. Hơnăm kố, khu mơdró hiăn kĭng tơkêa kô rôe dângu 700 ha priât vâ tê mơ’no ăm kơchơ a rot Têt Ất Tỵ hơnăm 2025.“Môi hơnăm á tê châ chât rơpâu tâ̆n priât ngi kong têa Sinuâ, hâi tối tê tung tơnêi têa xuân hên há. Ki lĕm dêi priêt  a Dak Lak kâ ga ngeăm. Hơnăm kố, ngin hiăng kĭ tơkêa rôe to lâi hrĭng ha priêt, ƀă yă sap 300-350 rơpâu liăn 1 hnông priêt ”.

Lâp tung kong pơlê Dak Lak nôkố ai lối 2.400 ha priât, châ vâ chê 66.000 tâ̆n. Mâu hdrê priât ki hên châ pê cho priât teâng veâng Nam Mỹ ƀă priât khom (hdrê kong têa Siam), tơkŭm pêt hên a mâu tơring Buôn Đôn, Ea Kar, Krông Păc, MDrak ƀă pơlê kong kơdrâm Buôn Ma Thuột, ƀă mâu tơmeăm pê lo ing chiâk deăng ki ê, priât cho tơmeăm ki rơdêi drêng pêt a mâu kơpong tơnêi ki pro tơvât pơla tơnêi khêi bazan ƀă tơnêi prêi a Dak Lak, kum chiâng vâ mơjiâng mâu hdrê loăng plâi ƀă kô châ xo hên liăn ngân ăm tơná kuăn pơlê.