Hiăng hmâ ƀă cheăng pêt reăng Têt vâ chê 10 hơnăm kố, pôa Ôn Văn Khi, ối a thôn 7A, cheăm Ea Bar, tơring Ƀuôn Đôn tối ăm ‘nâi: Rơnó Têt kố, pôa pêt 100 xiâm reăng Cúc pha lê ki hmâ trâm hlo, ƀă 70 xiâm reăng cúc ki kân xŏn. Pêt reăng Têt rế vâ kum ăm rơpŏng hngêi châ tê lo liăn, la xuân rế ai tơdroăng ki hơniâp ro dêi mơngế ki pêi chiâk pêi deăng. A tơnêi ki kố pôa hiăng pêt mâu hdrê prá, alâi, troh a khế 8, hơ’lêh chiâng pêt reăng cúc vâ tê a rơnó Têt. Hơnăm kố, pơreăng COVID19 hiăng châ mơdât, tơdroăng ki tí tăng rôe reăng Têt mơni kô ai hên nếo, pôa Ôn Văn Khi xuân mơdâ pêt hên mâu hdrê reăng tâ, pói tơngah ai tơ’nôm tơdroăng ki hơniâp ro:

“Vâ pêt reăng, hbrâ rơnáu hên tơdroăng, ing tơdroăng tơvât tơnêi athế tơvât tŭm têk mâu túa phon , cho phon ki pro ƀă hlá nhâ, athế ăm ga i tơmot, ki má péa nếo athế tí tăng rah hdrê reăng ki dâi lĕm vâ dêi tơná tơ’lêi rak ngăn tâ, ăm ga i lĕm tâ. Rak ngăn reăng mê cho athế đi đo tôh têa ăm i bê vâ ga chiâng dâi lĕm. Mơngế ki tê xuân hơniâp ro, mê mơngế ki rôe vâ ‘măn tơbleăng xuân hơniâp ro, hơnăm nếo châ ƀlêi chiâng tơdroăng ki nếo”.

Rơnó reăng Têt hơnăm kố, rơpŏng jâ Nguyễn Thị Hiệu, ối a thôn 3, cheăm Hoà Xuân, pơlê kong kơdrâm Ƀuôn Ma Thuột pêt 1.500 met karê reăng Cúc đại đoá vâ pôe tơkâng. Vâ chê 4 khế rak ngăn nhên, rơhí rơhó, mâu hâi ki kố, jâ ƀă mâu ngế tung rơpŏng hnguêi pêi cheăng plâ hâi plâ măng tung kơdrum, pôe tơkâng, rak ngăn reăng ăm ga i dâi lĕm ƀă tơpo reăng tro a rơnó Têt:

“Chôu phut ki kố, ngin dế pôe tơkâng, hlá ki ôh tá dâi vâ ăm xiâm reăng lĕm, reăng ki lâi ôh tá dâi lĕm mê kô pôe tah lôi, reăng ki lâi dâi lĕm mê pin athế roăng, ƀă chôu ki rak ngăn athế pro ti lâi troh hâi lơ 22 kô ai mâu reăng ki tơpo lĕm, tơ-eăng, ƀă troh a lơ 28 kô pôe xo dêi tâi tâng hlối”.

Ƀă pôa Nguyễn Ngọc Sung, ối a bêng Tân Lợi, pơlê kong kơdrâm Ƀuôn Ma Thuột tối, rêm roh Têt troh, rơnó hơngui vêh xuân cho roh ki pôa châ ai tơdroăng ki hơniâp ro xua ing tơdroăng pêi pêt, rak ngăn reăng mai. Hơnăm kố, pôa hiăng hbrâ vâ chê 400 xiâm loăng reăng mai ing 5 troh 70 hơnăm vâ châ mơ’no tê a kơchơ, tíu tê mơdró. Pôa tối ăm ngin ‘nâi, vâ kơ ai môi xiâm reăng mai ki lĕm dâi tơpo reăng a hâi Têt, pakĭng mâu kih thuât ki pôe tơkâng, mơjiâng pro hlá lĕm mơnâ mâ ngăn, rak ngăn, hbrâ kơdê oâ, hdrong mê kal athế seá ngăn kơ hyôh kong prâi, tơnêi tíu tâ tá vâ ai tơdroăng ki ‘mâi rơnêu ăm i tơtro.

“Tung môi hơnăm mê pin athế rơvât ăm i tro, tôh têa, ‘mâi rơnêu ăm tơkâng reăng i lĕm, troh mơ’nui hơnăm athế rak ăm hlá i ngiât, chí lĕm ƀă rơdêi vâ ga ai reeăng ki dâi lĕm, troh mơ’nui hơnăm sap ing khế 10 troh khế 12 cho kal kân khât ‘nâng, kal athế hnêi tah lôi hlá vâ reăng tơpo dâi lĕm”.

A mâu kơdrum reăng ki vâ tê a rơnó Têt a kong pơlê Quảng Nam, mâu hâi ki kố hiăng hlo kơdrâm kơdrĕng mâu khu ki mơdró ƀă mâu ngế ki vâ tí tăng rôe reăng. Hơnăm kố, hyôh kong prâi chía tơniăn mê reăng Têt a kong pơlê kố hiăng dâi khât ƀă tro tiô yă há. Rơpŏng jâ Trần Thị Thu, ối a cheăm Duy Trung, tơring Duy Xuyên pêt vâ chê 100 rơpâu xiâm tŭm hdrê, môi tiah reăng: Dạ yến thảo, Mai địa thảo, Cúc mâm xôi, Sao băng ƀă hên hĕng mâu hdrê reăng ki ê hía hiăng châ khu ki mơdró tí tăng rôe lối 70%.

Jâ Trần Thị Thu tối ăm ‘nâi, reăng hơnăm kố châ kơnâ yă, khu mơdró hmâ lăm troh rôe vâ chơ djâ mê vâi krâ - nhŏng o khoh pêi châ liăn tơniăn vâ rôe tơmeăm Têt:

“Hơnăm kố, reăng lĕm luâ tâ hơnăm nah, khu mơdró kâ hiăng troh vâ pâ rôe reăng vâ tê a hâi Têt, vâi hmâ ăm liăn hdrối. Tâng vâ pơchông ngăn ƀă hơnăm nah, hơnăm kố tê châ yă kơnâ hên tâ, yă reăng chía kơnâ luâ tâ hơnăm nah, á xuân châ pêi mơjiâng dêi reăng hên. Tâi tâng kơxô̆ liăn á pêi lo châ dâng 1 rơtal 400 rơtuh liăn, tơkéa ki tơkâ vâ lối tơdế. Á tŏng kum ăm 12 ngế châ pêi cheăng, kum ăm vâi tơ’lêi ai tơdroăng cheăng kâ tơniăn đi đo”.

      Tơring Duy Xuyên, kong pơlê Quảng Nam ai dâng 7 ha tơnêi ki pêt reăng vâ tê tung pơla rơnó Têt, ai lối hrĭng rơpŏng ki veăng pêt, ki hên cho reăng Vạn thọ, cúc, mâu hdrê reăng ki huăn kơxái, tơkŭm pêt hên cho a mâu cheăm Duy Thành, Duy Trung, Duy Nghiã, Duy Hải, pơlê kân Nam Phước. Tâng vâ riân ngăn 1 ha tơnêi ki pêt reăng mê kum ăm tơná kuăn pơlê châ liăn laih hên lối 200 rơtuh liăn, tâk hên tâ tâng vâ pơchông ngăn ƀă mâu tơdroăng ki pêt prá alâi, ƀă kơchâi plâi tŭm hdrê ki ê.

Pôa Phan Xuân Cảnh, Kăn hnê ngăn Vi ƀan tơring Duy Xuyên, kong pơlê Quảng Nam tối ăm ‘nâi, tâng vâ pơchông ngăn ƀă mâu hơnăm hdrối mê hía nah, hnăm kố, kơxô̆ tơnêi ki pêt reăng tâk hên tâ, tơdroăng mơ’no tê xuân châ tơ’lêi:

     “Tơring hiăng tŏng kum ‘na tơnêi kơdrum vâ pêt reăng, plâi kơchâi. Xuân chiâng vâ tối tiah kố, tung pơla dế tơ’lêi hlâu ƀă tơdroăng ki kal vâ rôe reăng mê hơnăm kố chía hiăng ai tơdroăng ki hơ’lêh nếo, cho vâ tŏng kum ăm mơngế pêi cheăng, thăm mơdêk kum ăm kuăn pơlê tơ’lêi tung tơdroăng hbrâ mơdât ki xahpá vâ kơdê pơreăng”.

Kong pơlê Quảng Nam ai vâ chê 2 rơpâu rơpŏng ki pêt reăng Têt. Kơvâ  ngăn ‘na chiâk deăng kong pơlê Quảng Nam, mê Khu ngăn ‘na pêi chiâk pêi deăng dêi kong pơlê hiăng kum mơngế pêt reăng châ mung kơxô̆ liăn, hbru kum hdrê loăng pêt, kum ăm vâi hmiân tuăn pêi pêt kế tơmeăm. Hơnăm kố, xua hyôh kong prâi tơniăn lĕm, yă reăng xuân chía tơniăn, kơxô̆ mơngế ki rôe xuân hên mê mơngế pêt reăng Têt a kong pơlê Quảng Nam hơniâp ro ó khât.